"აბსურდული გადაწყვეტილებები [PACE-ის რეზოლუცია] აჩვენებს, რომ ევროპული ბიუროკრატია საკმაოდ მძიმე მდგომარეობაშია. ეს ეხება როგორც ბრიუსელს, ისე სტრასბურგს", — ამის შესახებ ოცნების პრემიერმა, ირაკლია კობახიძემ ევროსაბჭოს საპარლამენტო ასამბლეის მიერ საქართველოზე მიღებულ რეზოლუციასა და თეა წულუკიანის განცხადებაზე კომენტირებისას თქვა.

მისი თქმით, ძალიან მნიშვნელოვანი იყო ის გადაწყვეტილება, რომელიც თეა წულუკიანმა დელეგაციის სახელით და ოცნების გუნდის სახელით გააკეთა, სადაც ნათქვამი იყო, რომ ქართული ოცნების დელეგაცია ევროსაბჭოს საპარლამენტო ასამბლეაში მუშაობას დღეიდან წყვეტს.

"ეს გადაწყვეტილება აჩვენებს, რომ ევროპული ბიუროკრატია არის საკმაოდ მძიმე მდგომარეობაში. ეს ეხება როგორც ბრიუსელს, ისე სტრასბურგს და ამის მორიგი გამოხატულებაა ეს უსამართლობა, რომელიც ჩვენ დღეს ვიხილეთ და უსამართლობაზე მეტად ეს იყო აბსოლუტურად აბსურდული გადაწყვეტილება.

ასეთი რაღაც გააკეთეს: დაამტკიცეს ჩვენი დელეგაცია, რითაც აღიარეს არჩევნების შედეგები და იქვე განაცხადეს, რომ აპრილამდე თუ არ ჩატარდება არჩევნები, გააუქმებენ დელეგაციას ჩვენი ქვეყნიდან. ანუ გამოდის რა, რომ არჩევნებს აღიარებენ, მაგრამ მაინც უნდათ არჩევნების ჩატარება, რატომ? იმიტომ, რომ წააგო ვიღაცის ფავორიტმა პოლიტიკურმა ძალამ, რასაც ჰქვია კოლექტიური ნაცმოძრაობა.

ასეთი აბსურდული გადაწყვეტილებები აჩვენებს იმას, რომ მძიმე ვითარებაა ევროპულ ბიუროკრატიაში, თუმცა, საბოლოო ჯამში ეს არსებითად ვერ ცვლის საერთო ვითარებას ჩვენი ქვეყნისთვის.

ძალიან მნიშვნელოვანი იყო ის გადაწყვეტილება, რომელიც გამოაცხადა ქალბატონმა თეა წულუკიანმა დელეგაციის სახელით და ჩვენი გუნდის სახელით. რა თქმა უნდა, ეს გადაწყვეტილება იყო აბსოლუტურად უალტერნატივო. ბუნებრივია, ასეთ ვითარებაში ჩვენი დელეგაცია არ აპირებს მუშაობის გაგრძელებას ევროსაბჭოს საპარლამენტო ასამბლეაში და დელეგაცია წყვეტს მუშაობას და მოხდება ამ დელეგაციის გამოწვევა ევროსაბჭოს საპარლამენტო ასამბლეიდან საქართველოს პარლამენტის მიერ. თუ შეიცვლება დამოკიდებულება ქართველი ხალხის მიმართ და ჩვენი ქვეყნის მიმართ, ამ შემთხვევაში, ჩვენ, რა თქმა უნდა, დავბრუნდებით ევროსაბჭოს საპარლამენტო ასამბლეაში. ასეთ ვითარებაში, რასაც დღეს ვხედავთ, იქ მუშაობას არავითარი აზრი არ აქვს. ეს არის საკმაოდ მარტივი საკითხი. რაიმე არსებითი მნიშვნელობა დღევანდელ გადაწყვეტილებას არ ჰქონდა ჩვენი ქვეყნისთვის, თუმცა აბსურდულობა არის ამ გადაწყვეტილების ასპექტი, რომელიც ანალიზს იმსახურებს", — თქვა კობახიძემ იმედი Live-ში.

რაც შეეხება PACE-ის რეზოლუციას, ის ოცნებას ვადამდელი არჩევნების დანიშვნას და პოლიტპატიმრების გათავისუფლებისკენ მოუწოდებს. ამას გარდა, მომდევნო სესიამდე, რომელიც აპრილში გაიმართება "ოცნების" დელეგაციას შეზღუდული უფლებამოსილება ექნება.