დავოსში, მსოფლიო ეკონომიკურ ფორუმზე გამართულ პანელურ დისკუსიაზე სომხეთის პრემიერმინისტრმა ნიკოლ ფაშინიანმა განაცხადა, რომ მისი აზრით, დიდია ალბათობა სომხეთის პარლამენტმა მიიღოს კანონპროექტი ევროკავშირში გაწევრიანების პროცესის შესახებ, რომელიც მანამდე სომხეთის მთავრობამ დაამტკიცა.

“ფაქტობრივად, იყო სამოქალაქო საზოგადოების ინიციატივა: მათ წარადგინეს კანონპროექტი ევროკავშირში გაწევრიანების პროცესის დასაწყებად. ჩვენმა მთავრობამ დაამტკიცა ეს კანონპროექტი და დიდია ალბათობა იმისა, რომ ჩვენი პარლამენტი მიიღებს მას, რაც ნიშნავს, რომ ვიწყებთ ევროკავშირთან ინტეგრაციის პროცესს. რატომ გვინდა ვიყოთ უფრო ახლოს ევროკავშირთან, რადგან ჩვენ ვართ დემოკრატიული სახელმწიფო. თუ დემოკრატი ხარ, გინდა დემოკრატიასთან უფრო ახლოს იყო, რადგან პირიქით ალოგიკური იქნება” – განაცხადა ნიკოლ ფაშინიანმა.

ცნობისთვის, 9 იანვარს სომხეთის მთავრობამ დაამტკიცა კანონპროექტი “სომხეთის რესპუბლიკის ევროკავშირში გაწევრიანების პროცესის დაწყების შესახებ”, რომლის განხილვასაც მალე, სომხეთის პარლამენტში აპირებენ.