რუსეთის პრეზიდენტი ვლადიმერ პუტინი მიიჩნევს, რომ რუსეთმა უკვე მიაღწია უკრაინის წინააღმდეგ ომის მთავარ მიზნებს, რადგან ის აკონტროლებს რუსეთის ფედერაციის მატერიკზე ანექსირებულ ყირიმთან დამაკავშირებელ ტერიტორიებს და დასუსტებულია უკრაინის შეიარაღებული ძალები. ამის შესახებ Reuters ანონიმურ წყაროზე დაყრდნობით იტყობინება.

Reuters-ის წყარომ დასძინა, რომ რუსეთის პრეზიდენტმა აღიარა, რომ ომი რუსეთის ეკონომიკაზე უარყოფით გავლენას ახდენს და დიდ პრობლემებს უქმნის მას. ამას გარდა, მაღალი საპროცენტო განაკვეთები გავლენას ახდენს ომთან დაკავშირებულ ინდუსტრიებზე.

სააგენტოს ხუთი წყარო ამბობს, რომ პუტინი სულ უფრო მეტად შეშფოთებულია რუსეთის ეკონომიკაში ომის დროს წარმოშობილი დისბალანსით. ბოლო პერიოდში სულ უფრო მწვავე პრობლემას ქმნის სამუშაო ძალის დეფიციტი და მაღალი საბაზისო განაკვეთები, რომელთა შემოღებაც მაღალი ინფლაციის მოსათოკად იყო საჭირო. Reuters წერს, რომ რუსეთის ელიტა თვლის, რომ კონფლიქტი მოლაპარაკებების გზით უნდა დასრულდეს.

პუტინი იმედგაცრუებულია ეკონომიკური პრობლემებით და 2024 წლის 16 დეკემბერს კრემლში გამართულ შეხვედრაზე ეკონომიკური პროფილის მაღალჩინოსნები გააკრიტიკა, წერს სააგენტო.

აშშ-ის პრეზიდენტი დონალდ ტრამპი ცდილობს სწრაფად დაასრულოს რუსეთ-უკრაინის ომი მან 22 იანვარს გამოაქვეყნა პოსტი, სადაც მაღალი ტარიფებისა და სანქციების დაწესებით იმუქრებოდა ყველაფერზე, რასა რუსეთი შეერთებულ შტატებში ყიდის, თუ პუტინი უარს იტყვის დაიწყოს მოლაპარაკებები ომის დასასრულებლად.

ამასთან, კრემლმა განაცხადა, რომ რუსეთს ჯერ არ მიუღია რაიმე კონკრეტული წინადადება მოლაპარაკებებთან დაკავშირებით. Reuters-ის ცნობით, პუტინი მზად არის ტრამპთან განიხილოს ცეცხლის შეწყვეტის ვარიანტები, მაგრამ ის დაჟინებით მოითხოვს, რომ უკრაინამ აღიაროს რუსეთის ტერიტორიული მიღწევები და უარი თქვას ნატოში გაწევრიანებაზე.