აშშ-ის არჩეული პრეზიდენტი დონალდ ტრამპი ჰოლივუდის "ოქროს ხანაში" დაბრუნებას აპირებს და ამისთვის კინოინდუსტრიის დედაქალაქში თავის "ელჩებს" მიავლენს. საგანგებო მისიის აღსასრულებლად კი ტრამპმა სილვესტერ სტალონე, მელ გიბსონი და ჯონ ვოიტი დაასახელა.

"დიდი პატივია, წარმოგიდგინოთ ჯონ ვოიტი, მელ გიბსონი და სილვესტერ სტალონე, როგორც საგანგებო ელჩები დიდებულ, მაგრამ ძალიან პრობლემურ ადგილას, ჰოლივუდში", — წერს არჩეული პრეზიდენტი სოციალურ ქსელში და ამატებს, რომ თავისი მიზანია "ჰოლივუდის დაბრუნება", — "იმაზე უფრო დიდი, უკეთესი და ძლიერი, ვიდრე ოდესმე ყოფილა. ეს სამი უნიჭიერესი ადამიანი ჩემი თვალები და ყურები იქნება, მე კი იმას შევასრულებ, რასაც ისინი მირჩევენ. როგორც შეერთებულ შტატებში, ასევე ჰოლივუდში, ისევ დადგება ოქროს ხანა".

თუმცა, როგორც ჩანს, საგანგებო ელჩებისთვის მათი ახალი თანამდებობის შესახებ წინასწარ არავის შეუტყობინებია.

"ეს ამბავი თქვენთან ერთად შევიტყვე და ზუსტად თქვენსავით გაოცებული ვარ", — განაცხადა გიბსონმა, — "რაც უნდა იყოს, გულისყურით მოვეკიდები საქმეს. ნებისმიერი სახის დახმარების გაწევა ჩემი, როგორც მოქალაქის, ვალდებულებაა. ისე, ნეტავ, ამ თანამდებობაზე საცხოვრებელი არაა გათვალისწინებული?".

ამ ბოლო კომენტარით მსახიობმა და რეჟისორმა მიანიშნა, რომ კალიფორნიაში ხანძრებს ცოტა ხნის წინ თავისი სახლიც შეეწირა.

გიბსონი კი, სტალონესა და ვოიტის მსგავსად, ბოლო წლებში ტრამპის ერთ-ერთი ყველაზე აქტიური მხარდამჭერი იყო. არჩეულ პრეზიდენტს სტალონემ "მეორე ჯორჯ ვაშინგტონიც" კი უწოდა. თუმცა, ჰოლივუდზე არანაკლებ პრობლემური რეპუტაცია თავად მელ გიბსონს აქვს, რომელიც ანტისემიტური განცხადებების გამო წლების განმავლობაში კინოინდუსტრიის "შავ სიაში" რჩებოდა. ამის მიუხედავად, გიბსონის ამ დროისთვის ბოლო ნამუშევარი Hacksaw Ridge (2016) ოსკარის მფლობელიც გახდა, წელს კი გამოდის რეჟისორის ახალი ფილმი, Flight Risk, მარკ უოლბერგით მთავარ როლში. ამასთან, გიბსონი თავისი გახმაურებული ბლოკბასტერის, ქრისტეს ვნებანის, გაგრძელების გადასაღებადაც ემზადება.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...