პოლიცია ადასტურებს რუსთაველის მეტროს მიმდებარე ტერიტორიაზე - ზანდუკელის ქუჩაზე - ორი მოქალაქის დაკავებას.

რადიო თავისუფლების ცნობით, შინაგან საქმეთა სამინისტროს პრესცენტრმა განაცხადა, რომ ისინი დაკავებულები არიან ადმინისტრაციულ სამართალდარღვევათა კოდექსის 173-ე და 174-ე პრიმა მუხლებით.

პირველი პოლიციელის კანონიერი მოთხოვნის დაუმორჩილებლობას გულისხმობს, მეორე კი - შეკრების ან მანიფესტაციის ორგანიზებისა და ჩატარების წესის დარღვევას.

დაკავებულები რატი ტყემალაძე და ოთარ კვარაცხელია არიან. ისინი ზანდუკელის ქუჩიდან სამოქალაქო ფორმაში გამოწყობილმა პირებმა მანქანაში ჩაისვეს და წაიყვანეს — გავრცელებულ ვიდეოებში ნათლად ჩანს, რომ პირებს, რომლებმაც ახალგაზრდები დააკავეს, არ ჰქონიათ პოლიციის მაიდენტიფიცირებელი ნიშნები. ჰიუნდაის მარკის მანქანას, რომლითაც, სავარაუდოდ, ისინი მიჰყავდათ, სტანდარტული ქართული სანომრე ნიშნები არ ჰქონდა. მისი ნომერი იყო M.040717.

18 იანვარს ფილარმონიიდან პარლამენტის შენობამდე საპროტესტო მსვლელობა გაიმართა, რომლის მონაწილეებმაც, პროტესტის ნიშნად, სახეები ნიღბებით დაიფარეს, რაც ქართული ოცნების პარლამენტის მიერ კანონში შეტანილი ცვლილების თანახმად, აკრძალულია. ოცნების მიერ მიღებული კანონის დარღვევა იწვევს დაჯარიმებას 5 000 ლარის ოდენობით ან ადმინისტრაციულ პატიმრობას 15 დღემდე ვადით.