თბილისის საქალაქო სასამართლომ ჯგუფური თაღლითობის მცდელობის ბრალდებით დაკავებულ მერიის არქიტექტურის სამსახურის უფროსის ყოფილ მოადგილეს, ლევან ძაგნიძეს აღკვეთის ღონისძიების სახედ პატიმრობა შეუფარდა. მასთან ერთად პატიმრობა შეეფარდა ძაგნიძესთან ერთად დაკავებულ არქიტექტორს.

ბრალდებულებს ბრალად ედებათ წინასწარი შეთანხმებით ჯგუფის მიერ მართლსაწინააღმდეგო მისაკუთრების მიზნით სხვისი დიდი ოდენობის ნივთის მოტყუებით დაუფლების მცდელობა.

ბრალდების თანახმად, დაკავებულებმა ურთიერთშეთანხმებით თბილისში, დიდი დიღმის ტერიტორიაზე მდებარე ოთხ მიწის ნაკვეთზე განაშენიანების რეგულირების გეგმის შეთანხმების სანაცვლოდ მოქალაქეს თითქოსდა თბილისის მერიის თანამშრომლებისათვის გადასაცემად 38 000 აშშ დოლარი მოსთხოვეს.

გამოძიების ვერსიით, ბრალდებულები მართლსაწინააღმდეგო მისაკუთრების მიზნით, 2016 -2017 წლებში 15 000 აშშ დოლარს დაეუფლნენ და ცდილობდნენ შეთანხმებული თანხის დარჩენილი ნაწილის მოტყუებით მიღებას. ლევან ძაგნიძე თბილისის მერიაში 2015-16 წლებში მუშაობდა.

საქმეზე წინასასამართლო სხდომა 2017 წლის 25 ოქტომბერს, 12:30 საათზე გაიმართება.