რადიო თავისუფლების ცნობთ, ბრალდებულთა ადვოკატების ბოიკოტის მიუხედავად მოსამართლემ სხდომა გააგრძელა, თუმცა პროცედურული დეტალების მოსაგვარებლად შესვენება გამოაცხადა.

ადვოკატების თქმით, სასამართლოს აქვს უფლება აღკვეთის ღონისძიების საკითხი ადვოკატების მონაწილეობის გარეშე გადასინჯოს, მაგრამ მიმდინარე საქმეზე ამ უფლების შესასრულებლად რამდენიმე ხელისშემშლელი გარემოება არსებობს — დაკავებული 8 პირიდან ოთხი 21 წელს მიუღწეველი, ერთი კი არაქართულენოვანია.

აღნიშნული გარემოების გათვალისწინებით პროკურატურა სახაზინო ადვოკატის დანიშვნას ითხოვს ირაკლი მიმინოშვილის, გიორგი გოშაძის, ნიკოლოზ ჯავახიშვილის, ზვიად ცეცხლაძის და ინსაფ ალიევისთვის.

მოსამართლე ირაკლი ხუსკივაძე სხდომას მას შემდეგ განაახლებს, როცა სასამართლო დარბაზში სახაზინო ადვოკატები მივლენ.

ფოტო: რადიო თავისუფლება - დაცარიელებული სხდომათა დარბაზი

ადვოკატებმა თბილისის საქალაქო სასამართლოს სხდომათა დარბაზი პროტესტის ნიშნად მას შემდეგ დატოვეს, რაც მოსამართლემ არ დააკმაყოფილა მათი შუამდგომლობა სხდომის დიდ დარბაზში ჩატარების შესახებ.

ერთ-ერთი დაკავებული, ირაკლი მიმინოშვილი გახდა შეუძლოდ. სასამართლოში გამოიძახეს სასწრაფო სამედიცინო დახმარებაც. ექიმებმა ჯანმრთელობის ცნობაში ჩაწერეს, რომ ის, სავარაუდოდ, უჰაერობის გამო გახდა შეუძლოდ, თუმცა, მოსამართლე ირაკლი ხუსკივაძემ მაინც არ მიიღო დარბაზის შეცვლის გადაწყვეტილება.