"ამერიკის ხმის" კითხვაზე, რა კომენტარს გააკეთებს "ქართული ოცნების" პოლიტსაბჭოს მიერ გამოქვეყნებულ წერილზე, სადაც ის "დეგრადირებულ პოლიტიკოსად" და "დიფ სთეითის" ნაწილადაა მოხსენიებული და ქვეყნის შესახებ აქტიურობის სანაცვლოდ ფულს იღებს, ჯო უილსონი ამბობს, რომ მისი ინტერესი საქართველოში მხოლოდ თავისუფალი და სამართლიანი არჩევნებია. უილსონის თქმით, მისი ინტერესი საქართველოში მხოლოდ თავისუფალი და სამართლიანი არჩევნებია.

"შემიძლია გითხრათ, რომ ჩემი ინტერესი საქართველოში თავისუფალი და სამართლიანი არჩევნებია. საქართველოში ვიზიტებისას, ჩემზე დიდი შთაბეჭდილება მოახდინა იმ ხალხმა, ვინც იქ გავიცანი. ასე რომ, ჩემი ინტერესი არაფერია, გარდა იმისა, რომ საქართველოს მოსახლეობას სამართლიანი და თავისუფალი არჩევნების შესაძლებლობა ჰქონდეს.

მთელი ჩემი ცხოვრების განმავლობაში, თავისუფალი და სამართლიანი არჩევნების ხელშეწყობისთვის ვიბრძოდი ცენტრალური და აღმოსავლეთ ევროპისთვის და ამან შედეგიც გამოიღო. ჩემთვის ძალიან ამაღელვებელია იმის ხილვა, თუ რა შესაძლებლობები აქვს ქართველ ხალხს, რომ მათ საბოლოოდ ჰქონდეთ სამართლიანი და თავისუფალი არჩევნები", — ამბობს კონგრესმენი.

ცნობისთვის, 8 იანვარს ქართული ოცნების პოლიტსაბჭომ განცხადება გამოაქვეყნა, რომელშიც კვლავ "გლობალური ომის პარტიისა" და "დიფ სთეითის" კონსპირაციებზე ილაპარაკა.

პარტია განცხადებაში უილსონზე საუბრობს, რომელიც, განსაკუთრებით ბოლო პერიოდია მწვავედ აკრიტიკებს პარტიას და რომელმაც "მეგობარი აქტის" წარდგენასა და ინიციირებაზე იმუშავა, ისე ბიძინა ივანიშვილის სანქცირებაზე.

აღსანიშნავია, რომ "მეგობარ აქტს“ ოცნებამ "მტერი აქტი" უწოდა, ხოლო უილსონი მოიხსენია როგორც "დეგრადირებული პოლიტიკოსი ნულოვანი პოლიტიკური კულტურით”.