ამერიკის შეერთებულმა შტატებმა ბიძინა ივანიშვილს სანქციები დაუწესა. კერძოდ ამერიკის სახელმწიფო ხაზინამ ბიძინა ივანიშვილი შეიყვანა უცხოური აქტივების კონტროლის ოფისის (OFAC) სანქცირებულთა სიაში (SDN).

"საერთაშორისო გამჭვირვალობა - საქართველოს" მთავარი ეკონომისტ ბესო ნამჩავაძის თქმით, სანქციები არის ინდივიდუალური და მხოლოდ ბიძინა ივანიშვილს ეხება. სანქცია გულისხმობს აშშ-ში მისი აქტივების გაყინვას და მასთან ნებისმიერი ტრანზაქციების შეწყვეტას.

დასანქცირების პარალელურად OFAC-მა გამოსცა ლიცენზია, რომლის თანახმად სანქციები არ ვრცელდება არც ბიძინა ივანიშვილის საკუთრებაში არსებულ კომპანიებზე. გამონაკლისის სახით სანქციები გაავრცელეს რუსეთთან დაკავშირებულ შესაძლო ტრანზაქციებზე და "კრედიტ სუისთან" დავის ფინანსურ შედეგებზე.

სანქციას თან ახლავს ჩანაწერი Secondary sanctions risk-ზე, რაც ძალიან მკაცრი მიდგომაა. ეს გულისხმობს, რომ ნებისმიერი ფიზიკური ან იურიდიული პირი, ვინც ივანიშვილთან რაიმე ტრანზაქციას განახორციელებს, აშშ-ს მხრიდან "დაიბლოკება" (შეეზღუდება წვდომა აშშ-ს ფინანსურ რესურსებზე, დოლარზე, ამერიკულ კომპანიებზე და სერვისებზე).

ეკონომისტის თქმით, აშშ-მ ივანიშვილი მაგნიტსკის სიაში არ შეიყვანა და ამით ოლიგარქს უკან დასახევი გზა დაუტოვა.

რატომ არ შეიყვანა აშშ-მა ივანიშვილი მაგნიტსკის სიაში, როცა ამის საფუძვლებიც არსებობს?
მაგნიტსკის სია არის ძალიან მკაცრი და ამავე დროს სადამსჯელო, მისი მიზანი არ არის დასანქცირებულ პირს ქცევა შეაცვლევინოს, შეაჩეროს. მისი მიზანი სამუდამო დასჯაა
OFAC-ის სანქცია ივანიშვილს აძლევს საშუალებას, ქცევის შეცვლის შემთხვევაში გამოვიდეს სანქციებიდან.

OFAC-მა ივანიშვილი არ დაასანქცირა სრულად. წინ კიდევ მნიშვნელოვანი ნაბიჯები დაიტოვა: სანქციების გავრცელება მის კომპანიებზე, მის ოჯახის წევრებზე და ბიზნეს-პარტნიორ ნათესავებზე." — წერს ეკონომისტი ბესო ნამჩავაძე სოციალურ ქსელში.