პოლონეთის სეიმის წევრი, აგნიეშკა პომასკა სოციალურ ქსელში წერს, რომ პოლონეთმა ვარშავაში EU-ს პარლამენტთა ევროკავშირის საქმეთა საპარლამენტო კომიტეტების კონფერენციაზე (COSAC) საქართველოს ევროინტეგრაციის კომიტეტის თავმჯდომარის მიწვევა გააუქმა.

"სენატის თავმჯდომარესთან, ტომაშ გროდსკისთან ერთად, გადავწყვიტეთ, რომ EU-ს ევროკავშირის საქმეთა საპარლამენტო კომიტეტების კონფერენციაზე ქართველი თავმჯდომარის მოწვევა გაგვეუქმებინა. საქართველოს ხელისუფლების წარმომადგენლებმა EU-სთან მოლაპარაკებების გაწყვეტა გადაწყვიტეს. საქართველოს ქუჩებში ხალხის მიერ დემოკრატიისთვის ბრძოლის ვითარება უარესდება. მათ მხარეს ვდგავართ, ვინც დემოკრატიას, თავისუფლებასა და ადამიანის უფლებებს იცავს. ნათელი გზავნილი გვაქვს: ამ ღირებულებების დარღვევას არ ვეთანხმებით. კვლავ დარწმუნებულები ვართ, რომ საქართველო ჩვენს ევროპულ საზოგადოებაში ადგილს იმსახურებს", — წერს პომასკა X-ზე.

ამასთან, პომასკა მის და გროდსკის მიერ ხელმოწერილ განცხადებას სრულად ავრცელებს.

"ღრმა შეშფოთებით ვაკვირდებით საქართველოში ბოლოდროინდელ განვითარებებს, რომლებიც დემოკრატულ უკუსვლასა და პოლიტიკური პლურალიზმის წინაშე მდგარ საფრთხეებს უკავშირდება. საქართველოს ხელისუფლების მიმდინარე ნაბიჯებს ქვეყნის შიდა ვითარებაზე ზიანის მომტანი გავლენა აქვს, დემოკრატიულ სტანდარტებთან მის შესაბამისობას უპირისპირდება და საქართველოს ევროინტეგრაციის გზას აშორებს. ეს ქმედებები დეტალურად არის აღწერილი ევროპარლამენტის 2024 წლის 28 ნოემბრის რეზოლუციაში საქართველოს ბოლოდროინდელი საპარლამენტო არჩევნებისა და არჩევნების სავარაუდო გაყალბების შემდგომ დემოკრატიული კრიზისის შესახებ, რომელიც განუხრელად უარესდება. ევროკავშირში საქართველოს ინტეგრაციის პროცესი ამჟამად შეჩერებულია. ქართველი ხალხი ხელისუფლების არჩეულ მიმართულებას დაუპირისპირდა და მასიურ დემონსტრაციებში მონაწილეობით დაპირისპირება ნათლად და ხმამაღლა გამოხატა. ქართული ოპოზიციური პარტიების წარმომადგენლები საქართველოს პარლამენტის მუშაობაში მონაწილეობაზე უარს ამბობენ, რამდენადაც მიაჩნიათ, რომ 2024 წლის 26 ოქტომბრის არჩევნები თავისუფალი და სამართლიანი არ ყოფილა.

ზემოხსენებულის გათვალისწინებით და ევროპარლამენტის 2024 წლის 28 ნოემბრის რეზოლუციის ფონზე, რომელიც ევროკავშირს EU-ს დონეზე საქართველოს მთავრობასთან და პარლამენტთან კონტაქტის მკაცრად შეზღუდვისკენ მოუწოდებს, დარწმუნებულები ვართ, რომ საქართველოს პარლამენტის წარმომადგენლებმა 2025 წლის 26-27 იანვარს ვარშავაში COSAC-ის თავმჯდომარეთა მომავალ შეხვედრაზე მონაწილეობა არ უნდა მიიღოს.

მიგვაჩნია, რომ EU-ს პარლამენტთა ევროკავშირის საკითხთა საპარლამენტო კომიტეტების კონფერენციების პროცედურების წესების 3.2 პუნქტში განსაზღვრული პრინციპი, რომლის თანახმადაც, კანდიდატი ქვეყნების პარლამენტის წევრები COSAC-ის შეხვედრებზე დამკვირვებლებად უნდა იყვნენ მიწვეულები, ამჟამად საქართველოს პარლამენტზე ვერ გავრცელდება, საქართველოს ხელისუფლების მხრიდან დემოკრატიული სტანდარტების დაუფარავი დარღვევის გათვალისწინებით.

იმედი გვაქვს, რომ გაიგებთ და მხარს დაუჭერთ ჩვენს პოზიციას, რომლის შესახებაც საპრეზიდენტო სამეულთან კონსტულირების შემდეგ ვაპირებთ, რომ საქართველოს ხელისუფლებას გავაცნოთ", — წერია განცხადებაში.