მალხაზ სონღულაშვილი: ჩვენ სოლიდარობას გამოვხატავთ იმ ბავშვების მიმართ, რომლებიც სცემეს, აწამეს ჩვენს ქალაქში და ეს ყველას სირცხვილია

7 Dec. 2024, 21:07

ჩვენ ძალიან განვსხვავდებით ერთმანეთისაგან ჩვენი რწმენით, ჩვენი ტრადიციებით, რიტუალებით, მაგრამ ჩვენ, ყველას გვწამს, რომ ღმერთი ერთია, ადამიანობა ერთია, ეს პლანეტა ერთია და ჩვენთვის, ამ ქვეყნის მკვიდრთათვის, ეს არის ერთი სამშობლო, სადაც ჩვენ ვცხოვრობთ და ცხოვრების ის პაწაწინა მონაკვეთი, რომელიც ადამიანმა უნდა გაატაროს ამ ქვეყანაზე, სჯობს გაატაროს მშვიდობაში, სიყვარულში, თავისუფლებაში, ურთიერთპატივისცემაში.

ჩვენ სხვადასხვანაირად გვაცვია, სხვადასხვა საღვთო წერილს ვკითხულობთ, მაგრამ ყველანი ერთ საქმეს ვემსახურებით — რომ ადამიანმა შეძლოს, დაინახოს ღმერთი, დაინახოს ადამიანი, შეძლოს თანაგრძნობა გამოხატოს ადამიანის მიმართ, რომელიც დაჩაგრულია, დამცირებულია, შევიწროებულია.

ჩვენ სოლიდარობას გამოვხატავთ იმ ბავშვების მიმართ, რომლებიც სცემეს, აწამეს ჩვენს ქალაქში და ეს ყველას სირცხვილია — თქვენი სირცხვილია, ჩვენი სირცხვილია, ჩვენი სამშობლოს სირცხვილია. ამ ბავშვებზე უკეთესი ჩვენ არავინ და არაფერი გვყავს ამ ქვეყანაში, თუ ესენი არ იქნებიან, ჩვენ მომავალი არ გვაქვს. არც ჩვენს კულტურას არ აქვს მომავალი, არც ჩვენს ქვეყანას.

გიყვარდეთ საკუთარი მომავალი. გიყვარდეთ ისინი, ვინც ყველაზე ძვირფასი არიან ჩვენში. ღმერთმა დაგლოცოთ, გაკურთხოთ და შეგაძლებინოთ, რომ სამართლიანობის მხარეს იყოთ ყოველთვის.

ბოლო ამბები:

კომენტარები

კვირის ტოპ-5

გირჩევთ

ახლა კითხულობენ

ყირგიზეთმა, უზბეკეთმა და ყაზახეთმა რუსეთში შავი ჭირის შესაძლო შემთხვევის გამო საზღვარზე კონტროლი გააძლიერეს