ცოტა ხნის წინ დასრულდა ისტორიული ორთაბრძოლა კრივში ფლოიდ მეივეზერსა და კონორ მაკგრეგორს შორის, რომელშიც მეივეზერმა ტექნიკური ნოკაუტით გაიმარჯვა.

ბრძოლა მეათე რაუნდამდე გაგრძელდა, თუმცა მთელი ამ დროის განმავლობაში უპირატესობას ამერიკელი მებრძოლი ფლობდა. საბოლოოდ, მეივეზერმა ირლანდიელ სპორტსმენს რამდენიმეჯერ მძიმედ დაარტყა, მაკგრეგორი კი თავს ვერაფრით იცავდა. ამის გამო, მსაჯმა სპორტსმენის ჯანმრთელობის მოფრთხილების მიზნით ბრძოლა შეაჩერა, რაც ავტომატურად მეივეზერის გამარჯვებას ნიშნავდა. აღსანიშნავია, რომ მეცხრე რაუნდისთვის მათ შორის ქულათა სხვაობა მინიმალური იყო და მაკგრეგორი მხოლოდ ერთი ქულით ჩამორჩებოდა (10:9).

ჩხუბის დასრულების შემდეგ, მეივეზერმა მაკგრეგორის გამძლეობა შეაქო და მისი პატივისცემა დაუდასტურა, თუმცა ისიც აღნიშნა, რომ მას ირლანდიელი სპორტსმენის დამარცხება უფრო ადრეც შეეძლო.

კონორ მაკგრეგორმა მეივეზერს გამარჯვება მიულოცა, თუმცა მსაჯის გადაწყვეტილება უსამართლოდ მიიჩნია.

"სრულიად საღ გონებაზე ვარ, არაფერი მიჭირდა... მე არ წავქცეულვარ, გონება არ დამიკარგავს და არც აზროვნება გამჭირვებია. მაცადე, რომ დავეცე, ეს ხომ ჩემი ბრძოლაა? მეივეზერი უფრო მობილიზებული აღმოჩნდა და ის იმსახურებდა ამ გამარჯვებას. " - თქვა კონორ მაკგრეგორმა.

თავიდან ბრძოლა თანაბრად მიმდინარეობდა. კონორ მაკგრეგორი სწრაფად უტევდა მეივეზერს, რომელიც საპასუხო დარტყმებითაც პასუხობდა. მეოთხე რაუნდის შემდეგ სიტუაცია შეიცვალა და მაკგრეგორზე სრული კონტროლი მეივეზერმა მოიპოვა.

ეს გამარჯვება ფლოიდ მეივეზერისთვის საიუბილეო, 50-ე გამარჯვება იყო. ის კრივის ისტორიაში დარჩა მებრძოლად, რომელსაც არც ერთი ორთაბრძოლა არ წაუგია.

შეგახსენებთ, რომ შეხვედრა დღეს, ლონ ანჯელესში, T-mobile Arena-ზე გაიმართა. მეივეზერი ჩხუბში მაკგრეგორმა გამოიწვია, რაც უამრავი ადამიანისთვის სენსაცია იყო. მაკგრეგორისთვის მოკრივის რანგში პირველი პროფესიონალური შეხვედრა იყო, აქამდე ის MMA-სა და UFC-ს სახეობაში ასპარეზობდა.