სტრასბურგის ადამიანის უფლებათა ევროპულმა სასამართლომ ფორმულას დამფუძნებლისა და თავდაცვის ყოფილი მინისტრის, დავით კეზერაშვილის წინააღმდეგ ე.წ. წვრთნების საქმეზე გადაწყვეტილება გამოიტანა.

საქმესთან დაკავშირებით სპეციალური ბრიფინგი იუსტიციის მინისტრმა, ანრი ოხანაშვილმა გამართა. მისი თქმით, სტრასბურგის სასამართლომ დადასტურდა, რომ კეზერაშვილმა თავდაცვის მინისტრობის დროს 2008 წლის ომამდე ბიუჯეტიდან გაფლანგა ქართული ჯარისთვის განკუთვნილი დიდი ოდენობით თანხა, 5 მილიონ 60 ათასი ევრო.

ამასთან ერთად, დავით კეზერაშვილთან დაკავშირებით, სასამართლომ დაადგინა სამართლიანი სასამართლოს უფლების დარღვევა სასამართლოს მიუკერძოებლობის ნაწილში.

სტრასბურგის სასამართლომ დაადგინა: ადამიანის უფლებათა ევროპული კონვენციის მეექვსე მუხლის პირველი პუნქტის დარღვევა ობიექტური სასამართლოს მიუკერძოებლობის ნაკლებობაზე.

ფორმულას ჟურნალისტმა მინისტრს ბრიფინგზე სტრასბურგის სასამართლოს გადაწყვეტილების იმ ნაწილის განმარტება სთხოვა, სადაც წერია, რომ დავით კეზერაშვილისთვის დაირღვა სამართლიანი სასამართლოს სარგებლობის უფლება.

მინისტრმა ამ კითხვის საპასუხოდ განაცხადა, რომ "უმნიშვნელო პროცედურული ხარვეზი დგინდება, მაგრამ ვერავითარი გავლენა ამას კანონიერ და სამართლებრივ გადაწყვეტილებაზე ვერ ექნება".

"სტრასბურგის სასამართლომ იმსჯელა იმასთან დაკავშირებით, რომ ადგილი შეიძლება ჰქონოდა უმნიშვნელო პროცედურულ ხარვეზს და ამასთან დაკავშირებით არის ნამსჯელი. ნებისმიერ იურისტს რომ ჰკითხოთ, ეს არის ტექნიკური საკითხები, რომელიც შეიძლება ყოველ მეორე გადაწყვეტილებაში იყოს. კეზერაშვილი ასევე ითხოვდა მორალური ზიანის ანაზღაურებას. ჯერ ხომ სახელმწიფოს ბიუჯეტი გაძარცვა, ჯარის ფული გაძარცვა და წაიღო 15 მლნ ლარი, დღევანდელი კურსით? ეს არ იკმარა და აქეთ პრეტენზიას აყენებდა და მორალური ზიანის ანაზღაურებისთვის 15 000 ევროს ითხოვდა. რაიმე დარღვევაზე რომ იყოს საუბარი, 15 000 ევროს გადახდაზე რატომ უთხრა უარი სასამართლომ? უმნიშვნელო პროცედურული ხარვეზი დგინდება, მაგრამ ვერავითარი გავლენა ამას კანონიერ და სამართლებრივ გადაწყვეტილებაზე ვერ ექნება", — განაცხადა ანრი ოხანაშვილმა.