მედია რადიო თავისუფლების მიერ გავრცელებული ინფორმაციით, დღეს, სენაკში, ქმარმა ცოლს, ცივი იარაღით, სხეულის სხვადასხვა მიდამოებში, მძიმე ჭრილობები მიაყენა, რის შედეგადაც ქალი გარდაიცვალა.

როგორც შინაგან საქმეთა სამინისტროში აცხადებენ, ბრალდებული ცხელ კვალზე დააკავეს.

გამოძიება დაწყებულია და მიმდინარეობს საქართველოს სისხლის სამართლის კოდექსის 11 პრიმა 109-ე მუხლის "კ" ქვეპუნქტით, რაც ოჯახის წევრის მიმართ დამამძიმებელ გარემოებაში ჩადენილ განზრახ მკვლელობას გულისხმობს.

სხვა დეტალები ჯერჯერობით უცნობია.

ცნობისთვის, 2024 წლის პირველ ექვს თვეში, შინაგან საქმეთა სამინისტრომ ოჯახში ძალადობის ფაქტებზე 4500-მდე შემაკავებელი ორდერი გამოსცა. საქართველოში, 2024 წლის პირველ რვა თვეში, რვა ქალი მოკლეს

ამავე პერიოდში, შინაგან საქმეთა სამინისტროს მიერ გამოქვეყნებული სტატისტიკის თანახმად, საქართველოში ოჯახში ძალადობის 5472 შემთხვევა აღირიცხა, მათ შორის ფიზიკური ძალადობის 1243 და ფსიქოლოგიური ძალადობის 4081 შემთხვევა.

თუ ხართ ოჯახში ძალადობის მსხვერპლი ან ფლობთ ინფორმაციას ოჯახში ძალადობის შესახებ, დარეკეთ ნომერზე 112 ან 116 006.