ვაჟა სირაძემ ქვეყანაში მიმდინარე მოვლებთან დაკავშირებით განცხადება გააკეთა. საპატრულო პოლიციის დეპარტამენტის უფროსის ინფორმაციით, საპროტესტო აქციაზე ადმინისტრაციული წესით უკვე ორი ადამიანი დააკავეს. ის აქციის მონაწილეებს აფრთხილებს, რომ "კანონის ჩარჩოებს გაცდენას" შსს-ის მხრიდან "უმკაცრესი ზომები" მოჰყვება.

"მინდა, მოვუწოდო აქციის მონაწილეებს, მათ ორგანიზატორებსა და, განსაკუთრებით, იმ აქტიურ პირებს, რომლებიც ჩადიან სხვადასხვა უკანონო ქმედებას.

შსს ყოველთვის აქციის მიმდინარე პერიოდში დგას საზოგადოებრივი უსაფრთხოების დაცვის მიზნით, აქციის დაწყებისთანავე უკვე დაიწყეს გარკვეულმა პირებმა სხვადასხვა სახის უკანონო მოქმედებები: პარლამენტის შესასვლელთან სხვადასხვა საგნის სროლა, რკინის ჯებირის დამტვრევა, ასევე, ფაქტი ჰქონდა შუშების ჩამსხვრევას, საიდანაც ახდენდნენ ცეცხლის წაკიდებას ოთახებში.

ამის შედეგად ჩვენ მიერ მოხდა რეაგირება და ორი პირი ამ ეტაპისთვის ადმინისტრაციული წესით არის დაკავებული. მინდა, ხაზი გავუსვა, რომ აქცია დაწყებულია 40 წუთია, მაქსიმუმ 1 საათი, და უკვე, გარკვეულმა პირებმა დაიწყეს ძალადობრივი ქმედებები.

მოვუწოდებ აქციის მონაწილეებს, განსაკუთრებით, იმ პირებს, რომლებიც მოწოდებულია აგრესიისკენ, რომ არ გასცდნენ კანონის ჩარჩოებს, ვინაიდან შსს-ის დანაყოფები ადგილზე მობილიზებულია იმისთვის, რომ დაიცვას კანონი", — აცხადებს ვაჟა სირაძე.