დროებითი მოთავსების იზოლატორიდან, 19 ნოემბერს მელიქიშვილის გამზირზე აქციის დროს დაკავებული პირები გაათავისუფლეს. დაკავებულთაგან ერთი პირი დიღმის დროებითი მოთავსების, ხოლო რვა პირი ზაჰესის იზოლატორში იმყოფებოდა.

ყველა მათგანმა, საპატიმრო დაწესებულებები დღეს დილით, 48 საათიანი ვადის ამოწურვის შემდგომ დატოვა.

"ყველა დაკავებულ პირს ძირითადად ედავებოდნენ წვრილმან ხულიგნობას და პოლიციისადმი დაუმორჩილებლობას. იმ პირებმა, რომლებმაც დაზიანებები დაკავების დროს მიიღეს, უკვე მიმართეს სპეციალურ საგამოძიებო სამსახურს და დაზარალებულის სტატუსი აქვთ", — ამის შესახებ ადვოკატმა ეკა ქობესაშვილმა მედია ინტერპრესნიუსთან განაცხადა.

შეგახსენებთ, რომ გუშინ, 20 ნოემბერს თბილისის საქალაქო სასამართლომ 8-დღიანი პატიმრობა მიუსაჯა ისაკო დევიძეს, რომელიც ასევე 19 ნოემბრის აქციაზე დააკავეს. ამასთან, სასამართლომ 2 700 ლარით დააჯარიმა ამავე დროს დაკავებული ირაკლი ანდღულაძეც.

ჯერ კიდევ არ არის გამოცხადებული გადაწყვეტილება დავით წოწორიას საქმეზე.