თიბისი ბანკის დამფუძნებელი მამუკა ხაზარაძე, ბანკის ფეისბუკ გვერდზე გამოქვეყნებულ ვიდეოში აცხადებს, რომ კომპანია ბორჯომი და თიბისი ჯგუფი ბორჯომში ხანძრისგან განადგურებულ ტერიტორიას აღადგენენ.

"ბორჯომში იწვის უნიკალური ტყე. ამ მდგომარეობიდან გამომდინარე, თიბისი ჯგუფმა კომპანია ბორჯომთან ერთად გადაწყვიტა, რომ აიღოს ვალდებულება გადამწვარი ტყის მასივის 10 ჰექტარის სრულად აღდგენაზე".

როგორც პოსტის აღწერაში ვკითხულობთ, ინიციატივას უერთდებიან მწვანე ქალაქი ლისზე, ანაკლიის განვითარების კონსორციუმი და კოკა-კოლა.

ხანძარი წაღვერის ტყეში 20 აგვისტოს შუადღისას გაჩნდა. ქარიანი ამინდის გამო ცეცხლი ტერიტორიაზე სწრაფად გავრცელდა, მის ჩაქრობას სამი დღეა ასობით მეხანძრე და ვერტმფრენები ცდილობენ, თუმცა უშედეგოდ.

გარემოს დაცვის სამინისტროს განცხადებით, ბორჯომის რაიონში ხანძრის კერა 2008 წლის აგვისტოს თვეში რუსეთ-საქართველოს შეიარაღებული კონფლიქტის შედეგად გადამწვარი ტყის ფართობზე - 2014-2017 წელს აღდგენილ ტერიტორიებსა და 2008 წლის ხანძარს გადარჩენილი ტყის მასივს შორის არსებულ ფართობზე წარმოიშვა.