გარემოს დაცვის სამინისტროს განცხადებით, ბორჯომის რაიონში ხანძრის კერა 2008 წლის აგვისტოს თვეში რუსეთ-საქართველოს შეიარაღებული კონფლიქტის შედეგად გადამწვარი ტყის ფართობზე - 2014-2017 წელს აღდგენილ ტერიტორიებსა და 2008 წლის ხანძარს გადარჩენილი ტყის მასივს შორის არსებულ ფართობზე წარმოიშვა.

უწყების ცნობით, ცეცხლის სწრაფად გავრცელება ძლიერმა ქარმა, რთულმა რელიეფურმა პირობებმა და ტერიტორიაზე არსებულმა ნახანძრალი მცენარეების, ბუჩქებისა და ბალახის სწრაფმა წვამ განაპირობა.

გარემოს დაცვის სამინისტროს განცხადებაში წერია, რომ გუშინდელი მუშაობის შემდეგ, "საფრთხე შერბილებულია" და ხანძარსაწინააღმდეგო ტექნიკა ცეცხლის კერამდეა აყვანილი.

ხანძრის სრულად ჩაქრობის შემდეგ, სატყეო სააგენტოს თანამშრომლები ტერიტორიაზე მორიგეობას რამდენიმე დღის განმავლობაში გააგრძელებენ და დაიწყება ტერიტორიის დეტალური შესწავლაც, რომლის დროსაც დაზუსტდება გარემოზე მიყენებული ზიანი და დაიგეგმება შემდგომი ღონისძიებები.

გარემოს დაცვის სამინისტროს ცნობით, ცეცხლით მოცული ტერიტორია წარმოადგენს საპროექტო ფართობს და მასზე ტყის აღდგენის ღონისძიებების განხორციელება მიმდინარე წლის საშემოდგომო სეზონზე იგეგმებოდა.

სტიქიის მესამე დღე ბორჯომის ხეობაში: ტყეს ცეცხლი ისევ უკიდია.

ფოტო: გარემოს დაცვის სამინისტრო

ფოტო: გარემოს დაცვის სამინისტრო