რაც აქ ხდებოდა, იყო კანონდარღვევა, — ამის შესახებ საპატრულო პოლიციის დეპარტამენტის მთავარი სამმართველოს უფროსის მოადგილე გოგა მემანიშვილმა ჭავჭავაძის გამზირზე განაცხადა.

მისი თქმით, აქციის მონაწილეები ხელოვნურად კეტავდნენ გზას მაშინ, როცა ადგილზე საკმარისი რაოდენობა ხალხი არ იყო.

"სპეცრაზმისა და აღჭურვილობის ის რაოდენობაა, რაც სჭირდება საზოგადოებრივი წესრიგის დაცვას ამ ეტაპზე. ეს იყო კანონდარღვევა, რაც აქ ხდებოდა და მაგაზე შესაბამისი განმარტება მივეცით, გზას ხელოვნურად კეტავდნენ, როცა არ იყვნენ ამისთვის საკმარისი რაოდენობის", — განაცხადა გოგა მემანიშვილმა.

ჭავჭავაძის გამზირზე, თსუ-ს პირველი კორპუსის მიმდებარე ტერიტორია, ადგილზე, სადაც აქციის მონაწილეებს გზა ჰქონდათ გადაკეტილი, ამ დროისთვის, სრულად სამართალდამცავებს უკავიათ. საპოლიციო ძალები, მათ შორის სპეცრაზმი განთავსებულია, როგორც ჭავჭავაძის გამზირის დასაწყისში, ისე ვარაზისხევზე, კეკელიძის ქუჩასა და მელიქიშვილის გამზირზე.