ალბათ ყველას გსმენიათ, რომ ჰიპების ერთ-ერთი ყველაზე საყვარელი მანქანა ფოლკსვაგენის მიკროავტობუსია. მისი წარმოება გერმანულმა კომპანიამ 2013 წელს შეწყვიტა, თუმცა ცნობილი გახდა, რომ ფოლკსვაგენი, ჰიპების საყვარელი მიკროავტობუსისთვის ახალი სიცოცხლის მიცემას აპირებს.

გერმანულმა კომპანიამ გადაწყვიტა, რომ ელექტრო მანქანების წარმოებაში აქტიურად ჩაერთოს და 2022 წლისთვის I.D Buzz-ის პრეზენტაცია დააანონსა. ცოტა ხნის წინ, 2017 წლის იანვარში, კომპანიამ მანქანის სავარაუდო დიზაინი გაასაჯაროვა, თუმცა მაშინ დეტალები არ გაუხმაურებიათ.

ფოტო: Volkswagen

დადგა დღე, როცა ფოლკსვაგენმა ახალი თაობის მიკროავტობუსის მახასიათებლების შესახებ ღიად დაიწყო საუბარი. პირველ რიგში გაირკვა, რომ I.D Buzz-ი ბაზარზე 2022 წლისთვის გამოჩნდება.

ფოლკსვაგენის ახალი მანქანა მთლიანად ელექტრო იქნება და ის ჰიბრიდების კატეგორიას არ განეკუთვნება. ახალი თაობის მიკროავტობუსს 369 ცხენის ძალა ექნება. მანქანა, სრული დატენვის შემდეგ, 500 კილომეტრის გავლას შეძლებს, ხოლო როცა მისი ენერგია ამოიწურება, ფოლკსვაგენის სწრაფი დატენვის სისტემის წყალობით, ნახევარ საათში, 80%-მდე დაიტენება.

ელემენტები მანქანის იატაკის ქვეშ იქნება დაყენებული. როგორც კომპანია ამბობს, ამგვარი მიდგომა დაეხმარებათ, რომ მანქანა უფრო კომპაქტური იყოს და მეტი ადამიანი, სკამი თუ სხვადასხვა ნივთები დაიტიოს. მათი გათვლებით, მანქანაში არსებული სივრცე უფრო მეტი იქნება, ვიდრე მიკროავტობუსების წინა, რეტრო ვერსიებს ჰქონდათ.

მანქანა ნახევრად ავტომატური დაქოქვის სისტემით იქნება აღჭურვილი. ამასთან, მანქანაში ინტეგრირებული იქნება მესამე დონის ავტომატური მართვის შესაძლებლობა, რაც იმას ნიშნავს, რომ მძღოლის საჭიროება ჯერ კიდევ იარსებებს, თუმცა მანქანას ავტომატურადაც შეეძლება მანევრების გაკეთება. ეს სისტემა ამცირებს ავარიებისა თუ სხვა საგზაო დაბრკოლებების შანსს.

ფოტო: Volswagen

I.D Buzz-თან ერთად, გამოვა სადისტრიბუციოდ განკუთვნილი მიკროავსტობუსიც, რომელიც კომპანიებმა სხვადასხვა ტვირთებისა თუ პროდუქტების გადასატანად შეიძლება გამოიყენონ.

გარდა ამისა, ცნობილი ხდება, რომ ფოლკსვაგენი 2025 წლისთვის მთლიანად ავტომატური მართვის სისტემით აღჭურვილი მანქანის გამოშვებასაც გეგმავს.