5-6 ნოემბერს ჟენევამ სამხეთ კავკასიაში უსაფრთხოებისა და სტაბილურობის საერთაშორისო დისკუსიების 62-ე შეხვედრას უმასპინძლა.

შეხვედრას საქართველოს, აშშ-ის, რუსეთის, ევროკავშირის, გაეროს, ეუთოს, ოკუპირებული აფხაზეთისა და ოკუპირებული სამხრეთ ოსეთის წარმომადგენლები ესწრებოდნენ. რუსეთის საგარეო საქმეთა სამინისტროს განცხადებაში ვკითხულობთ, რომ რუსულმა მხარემ შეხვედრაზე ე.წ "საზღვრების" დელიმიტაციისა და დემარკაციის საკითხი დააყენა.

"რუსულმა მხარემ ხაზი გაუსვა თბილისიდან მომავალი შემრიგებლური სიგნალების პრაქტიკაში, კონკრეტულ ნაბიჯებში გადმოთარგმნის, კონსოლიდაციისა და გაფართოების მნიშვნელობას, მათ შორის საქართველოს მხრიდან აფხაზეთისა და სამხრეთ ოსეთის წინააღმდეგ ძალის გამოუყენებლობის იურიდიული გარანტიების საკუთარ თავზე აღებასა და საზღვრების დელიმიტაციის პროცესის დაწყებას, მათი შემდგომი დემარკაციისთვის", — ვკითხულობთ განცხადებაში

რუსეთის საგარეო საქმეთა სამინისტროს განცხადებაში აღნიშნულია ისიც, რომ საქართველომ აღიარა ისეთი საგარეო ძალების არსებობა, რომელიც ქვეყნის რუსეთის წინააღმდეგ ომში ჩართვაზე მუშაობდნენ.

შეგახსენებთ, რომ წინასაარჩევნო კამპანიის მიმდინარეობისას, აგვისტოს ომიდან 16 წლის შემდეგ, ქართული ოცნების საპატიო თავმჯდომარემ, ბიძინა ივანიშვილმა 2008 წლის ომის დაწყებაში საქართველოს მაშინდელი ხელისუფლება დაადანაშაულა და ამის გამო ბოდიშის მოხდაც დააანონსა, რასაც საზოგადოების უარყოფითი რეაქცია მოჰყვა.