რუსეთის პარლამენტის ზედა პალატამ, ფედერაციის საბჭომ, რუსეთსა და კორეის სახალხო-დემოკრატიულ რესპუბლიკას შორის სტრატეგიული პარტნიორობის შეთანხმების რატიფიცირება დაამტკიცა. დოკუმენტს ორი ქვეყნის მეთაურებმა, ვლადიმირ პუტინმა და კიმ ჩენ ინმა, მიმდინარე წლის ივნისში ფხენიანში მოაწერეს ხელი. შეთანხმება სამხედრო დახმარების შესაძლებლობასაც ითვალისწინებს ერთ-ერთი პარტნიორი ქვეყნის ტერიტორიაზე თავდასხმის შემთხვევაში.

დოკუმენტი ტერორიზმთან ბრძოლის, ტურიზმის, ჯანდაცვის, განათლების, სოფლის მეურნეობის სფეროებში თანამშრომლობისა და ერთობლივი სამხედრო წვრთნების გარდა, ითვალისწინებს რუსეთისა და კსდრ-ის ვალდებულებას, სასწრაფო სამხედრო და სხვა სახის დახმარება გასწიონ იმ შემთხვევაში, თუ ერთ-ერთ ქვეყანას თავს დაესხმიან ან ის ომის მდგომარეობაში აღმოჩნდება. აღნიშნულია, რომ ხელშეკრულება განუსაზღვრელი ვადით მოქმედებს.

დოკუმენტის მიღება, ფაქტობრივად, ადასტურებს დასავლეთის ქვეყნების, უკრაინისა და სამხრეთ კორეის სადაზვერვო ანგარიშებს, რომელთა თანახმადაც, ათასობით ჩრდილოეთკორეელი ჯარისკაცი რუსეთში საომრად გაიგზავნა.