საარჩევნო უბნები ყველაზე ადრე ვერმონტის შტატში იხსნება და ყველაზე გვიან — ჰავაის შტატში. ამომრჩევლებმა არჩევანი დემოკრატიული პარტიის კანდიდატ, ვიცე-პრეზიდენტ კამალა ჰარისსა და რესპუბლიკელ კანდიდატ, ყოფილ პრეზიდენტ დონალდ ტრამპს შორის უნდა გააკეთონ.

BBC წერს, რომ აშშ-ის არჩევნების შედეგები უბნის დახურვიდან რამდენიმე საათში ხდება ხოლმე ცნობილი, მაგრამ წლევანდელი დაძაბული კონკურენციიდან გამომდინარე, შედეგების გამოცხადებას შეიძლება მეტი დრო დასჭირდეს.

აშშ-ის საპრეზიდენტო არჩევნებში ხმის მიცემის წინასწარი პროცედურით უკვე 81 მილიონზე მეტმა მოქალაქემ ისარგებლა.

ამერიკული საარჩევნო სისტემით, საპრეზიდენტო არჩევნებში გამარჯვებულს საბოლოოდ შტატების მიხედვით დაკომპლექტებული საარჩევნო კოლეგია გამოავლენს. კანდიდატებს გამარჯვებისთვის სჭირდებათ სულ მცირე 270 ხმა.