58 წლიანი მმართველობის შემდეგ, ბოტსვანის პრეზიდენტმა, მოკვეცი მასისიმ არჩევნებში დამარცხება აღიარა. მისმა "ბოტსვანის დემოკრატიულმა პარტიამ" (BDP) არჩევნები დიდი სხვაობით წააგო.

კოალიცია "ქოლგა დემოკრატიული ცვლილებებისთვის" (UDC) ლიდერი, ახლად არჩეული პრეზიდენტი 54 წლის იურისტი დუმა ბოკო გახდა. მისმა კოალიციამ პარლამენტში უმრავლესობის მოსაპოვებლად 31-ადგილიანი ზღვარი გადალახა.

"ხვალიდან მე დავიწყებ [ხელისუფლების] გადაცემის პროცესს და შეგიძლიათ, ჩემი იმედი გქონდეთ, რომ ყოველთვის ვიქნები აქ, რათა რაზეც მოგინდებათ ნებისმიერი სახის რჩევა მოგცეთ", — ამის შესახებ მასისიმ ბოკოს სატელეფონო საუბარში უთხრა. ჩანაწერი მოგვიანებით სოციალურ ქსელ X-ზე გავრცელდა.

მასისიმ ასევე თქვა, რომ ბოკოსთან თანამშრომლობისთვის მზად არის.

"ჩვენ გადავინაცვლებთ ერთგულ ოპოზიციად არსებობისკენ და ვიმუშავებთ თქვენთან [ახალ ხელისუფლებასთან] ერთად ჩვენი ქვეყნის გასაუმჯობესებლად", — თქვა მასისიმ.

მმართველი პარტიის მარცხი, როგორც ანალიტიკოსები ამბობენ, სოციო-ეკონომიკურ საკითხებზე მზარდი უკმაყოფილება გახდა, რაც მკვეთრად გამოიხატებოდა განსაკუთრებით ახალგაზრდებში.

ცნობისთვის, ბოტსვანაში პრეზიდენტს პარლამენტი ირჩევს.

სახელმწიფო ტელევიზიის მონაცემებით, UDC-ს პარლამენტში 32 მანდატი ჰქონდა მოპოვებული, ხოლო BDP ოთხ პარტიას შორის ბოლო ადგილზე იყო, მოპოვებული 4 ადგილით.