თუკი ჩინელი მწერლის, ლი იონგბიაოს 2010 წელს დაწერილ რომანს, დანაშაულით სავსე საიდუმლოს, წაიკითხავთ, მასში იმ კრიმინალური ისტორიის შენიღბულ ვერსიას გაეცნობით, რომლის მონაწილეც თავად მწერალი იყო.

ნოველის პროლოგში ავტორი თავის დიდი ხნის სურვილზე ყვება, დაეწერა დეტექტიური ამბავი მწერალ ქალზე, რომელიც ჩადენილი მკვლელობების მიუხედავად, პოლიციას თავს აღწევდა.

"ამის იდეა მაშინ დამებადა, როდესაც რამდენიმე დეტექტიური ნოველა წავიკითხე და კრიმინალურ თემებზე გადაღებულ ფილმებს ვუყურე. მასზე მუშაობისას, მთავარი იყო ლამაზი მწერალი, რომელიც კლავდა", წერდა მაშინ ლი იონგბიაო.

თუმცა ისტორია, რომელსაც მწერალი მხატვრულ ნაწარმოებად ასაღებდა, რეალური აღმოჩნდა და 11 აგვისტოს, პოლიციამ 53 წლის ლი იონგბიაო 22 წლის წინ ოთხი ადამიანის ცემით მოკვლის ბრალდებით დააპატიმრა.

"მთელი ეს დრო გელოდებოდით", უთხრა მწერალმა პოლიციელებს, როდესაც სამართალდამცავებმა სახლში მიაკითხეს.

საზარელი მკვლელობა 1995 წლის 29 ნოემბრის ღამეს ჰოსტელში მოხდა. ოფიციალური ინფორმაციით, ორმა კაცმა ჰოსტელი სხვა კლიენტების გაძარცვის მიზნით იქირავა, თუმცა როდესაც ჰოსტელის ერთ-ერთი სტუმარი ქურდობის ფაქტს შეესწრო, მძარცველებმა ის მოკლეს.

მკვლელობას მოხუცი ცოლ-ქმარი და მათი 13 წლის შვილიშვილი შემთხვევით შეესწრნენ. მძარცველებმა წინა დანაშაულების დასაფარად ისინიც სასტიკი ცემით მოკლეს.

ადგილობრივმა პოლიციამ საქმის გამოძიება დაიწყო, თუმცა მალე ერთ ადგილზე გაიყინა.

"ჩვენთვის უდიდესი გამოწვევა ის იყო, რომ ეჭვმიტანილებსა და მსხვერპლებს შორის კავშირს ან წარსულ ურთიერთობას ვერ ვპოულობდით. ძალიან რთული იყო მკვლელის კვალზე გაყოლა", ამბობს ერთ-ერთი გამომძიებელი.

თავის 30 წლიანი კარიერის მანძილზე, ლიმ მწერლის კარიერაში წარმატებას მიაღწია. 2013 წელს, ის ჩინეთის მწერალთა ასოციაციაში მიიღეს და ლიტერატურაში პრესტიჟული პრიზიც გადასცეს.

ჩვენების მიცემისას, მწერალმა პოლიციას უთხრა, რომ მკვლელობის შემდეგ დანაშაულის გრძნობას ვერ გაურბოდა და ღამით ძილი უჭირდა. მისი დაკავებიდან რამდენიმე საათში, მკვლელობაში თანამონაწილე პირი პოლიციამ შანხაიში დააპატიმრა.

სამართალდამცავების თქმით, როდესაც პოლიცია მწერლის სახლში მივიდა, მას ცოლისთვის დაწერილი წერილი უკვე მზად ჰქონდა:

"საბოლოოდ დადგა დღე, რომელსაც 20 წელი ველოდი. ახლა შემიძლია ჩემი ხანგრძლივი სულიერი ტანჯვისგან გათავისუფლება", ეწერა წერილში.