ნიუ-იორკში, მორგანის ბიბლიოთეკის სარდაფში, შოპენის აქამდე უცნობი ვალსი აღმოაჩინეს. ნაწარმოები თითქმის 200 წლის წინ არის დაწერილი.

New York Times იტყობინება, რომ ხელნაწერი, რომელზეც ფრედერიკ შოპენის ხელმოწერა იყო, კურატორმა რობინსონ მაკლელანმა გაზაფხულზე იპოვა.

"ვიფიქრე: რა ხდება აქ? რა შეიძლება იყოს ეს? მე არ მეცნო ეს მუსიკა" — განუცხადა გაზეთს კურატორმა რობინსონ მაკლელანმა.

ფოტო: thetimes

მაკლელანი ესაუბრა პენსილვანიის უნივერსიტეტის აკადემიკოსს, რომელიც პოლონელი კომპოზიტორის ექსპერტია და მასთან ერთად განაგრძო ხელნაწერის შესწავლა. მელნისა და ქაღალდის შემოწმების შემდეგ დაადგინეს, რომ აღმოჩენილი ნაწარმოები ნამდვილად შოპენს ეკუთვნოდა.

ამ აღმოჩენამ დებატები შეიძლება გამოიწვიოს კლასიკური მუსიკის სფეროში. ექსპერტები ახლად აღმოჩენილი შედევრების შესახებ ცნობებს ზოგჯერ სკეპტიკურად უყურებენ, რადგან ხშირია გაყალბების მცდელობა, იტყობინება New York Times.

შოპენის ახლად აღმოჩენილი ნამუშევრები იშვიათია. კომპოზიტორი ალკოჰოლიზმით იტანჯებოდა და 39 წლის ასაკში გარდაიცვალა. მან დაახლოებით 250 ნაწარმოები დაგვიტოვა. მორგანის მუზეუმის მკვლევარების აზრით, ახლად აღმოჩენილი კომპოზიცია 1830-დან 1835 წლამდეა დაწერილი, როდესაც შოპენი, სავარაუდოდ, 20 წლის იყო. მელოდიას მკვეთრი გახსნა აქვს. როგორც პიანისტმა ლანგ ლანგმა აღწერა, " ესაა დრამატული სიბნელე, რომელიც ნელ-ნელა პოზიტიურ სინათლეში გადადის".