საქართველოს პრემიერმინისტრმა, ირაკლი კობახიძემ და პარლამენტის თავმჯდომარე შალვა პაპუაშვილმა საარჩევნო უბანზე საკუთარი არჩევანი უკვე დააფიქსირეს.

“თავისთავად ქართული ოცნება არის ერთადერთი არჩევანი, რომელიც ქართველ ხალხს აქვს, რადგან ეს არის არჩევანი სიკეთესა და ბოროტებას შორის, ეს არის არჩევანი უღმერთობასა და სულიერებას შორის, ეს არის არჩევანი, რომელიც იშვიათად უდგება ხოლმე ჩვენს ხალხს ეგეთი მომენტები და ამიტომ მნიშვნელოვანია, რომ დღეს ყველა, ქუდზე კაცი დაირაზმოს საარჩევნო უბნებზე, მხარი დაუჭიროს ქართლ ოცნებას, რომელიც ამ ქვეყანაში 12-წლიანი მშვიდობის გარანტია არის, რომელიც ამ ქვეყანაში, ევროპისკენ ღირსეული წინსვლის და ამ ქვეყანაში, კეთილდღეობის მატების გარანტიაა”, — განაცხადა შალვა პაპუაშვილმა.

პრემიერის თქმით, ქართულ ოცნებას ამომრჩევლებისგან 60%-იანი მხარდაჭერის მოლოდინები აქვთ.

“დღეს კიდევ ერთხელ უნდა შევახსენოთ საკუთარ თავს, რომ ეს არის ძალიან პრინციპული, გამწყვეტი არჩევნები, რეფერენდუმის ტოლფასი არჩევნები, სადაც კიდევ ერთხელ, საბოლოოდ უნდა გადაწყდეს ქვეყნის განვითარების მიმართულება, ეს არის რეფერენდუმი ომსა და მშვიდობას შორის, ეს არის რეფერენდუმი ამორალურ პროპაგანდასა და ტრადიციულ ფასეულობებს შორის და ეს არის რეფერენდუმი წარსულსა და ქვეყნის ნათელ მომავალს შორის, თქვენ ხედავთ, რომ არის ორი პოლიტიკური ძალა, რომელიც არსებითად მონაწილეობს ამ არჩევნებში და ერთი მხარე გვთავაზობს იმ ყველაფერს რაც უნდა დავტოვოთ ჩვენ წარსულში და ჩვენ ვთავაზობთ ამომრჩეველს ნათელ მომავალს, მშვიდობას, ეკონომიკურ წინსვლას და ჩვენი ქვეყნის განვითარებას. ჩვენ გვაქვს ძალიან ოპტიმისტური პროგნოზი ამ არჩევნებთან დაკავშირებით, ველოდებით 60%მდე ხმებს ჩვენი მოქალაქეებისგან, ეს არის პრინციპულად მნიშვნელოვანი იმისთვის, რომ ქვეყანამ განაგრძოს სტაბილურად განვითარება”, — განაცხადა ირაკლი კობახიძემ.