ძლიერი საქართველოს ერთ-ერთმა ლიდერის სალომე სამადაშვილის თქმით, გავრცელდა ინფორმაცია, რომ ისრაელში, სადაც ერთადერთი საარჩევნო უბანი გაიხსნა, ცდილობენ, არჩევნებში მონაწილეობის უფლება საქართველოს 2 000-ზე მეტ მოქალაქეს წაართვან.

მისი თქმით, ამ სპეცოპერაციას საქართველოს მოქალაქეების და ქვეყნის დემოკრატიული მომავლის წინააღმდეგ ყოფილი ელჩი ისრაელში, ლაშა ჟვანია ხელმძღვანელობს

როგორც სამადაშვილი ამბობს, კომისიაში ქართული ოცნების წარმომადგენლები არჩევნების დღეს არ აპირებენ არჩევნების ჩასატარებლად გამოცხადებას.

როგორც ძლიერი საქართველოს ლიდერი ამბობს, ყველა, ვინც დღეს ან ხვალ შეეცდება ქართველი ხალხის კონსტიტუციური უფლებების ხელის შეშლას და თავისი საარჩევნო უფლებების განხორციელებას, პასუხი მოეთხოვება.

"ქართველი ხალხის გამარჯვებამდე სულ რაღაც 30 საათი დარჩა. ცხადია, რომ ხვალ ისტორიულ არჩევნებზე ხალხი აკეთებს არჩევანს ევროპული მომავლის, ძლიერი ქართული სახელმწიფოს და დემოკრატიული მომავლის სასარგებლოდ. ეს იცის რუსულმა რეჟიმმა, რომელიც დღეს საკუთარი ხელისუფლებაში ყოფნის უკანასკნელ საათებს ითვლის. მაგრამ რეჟიმი არ ნებდება და ყველანაირი გზით, მათ შორის, კომიკურად სასოწარკვეთილი მცდელობით ცდილობს, რომ ხელი შეუშალოს ქართველი ხალხის ნების გამოხატვას იქ, სადაც ზუსტად იცის, რომ არჩევნებს პირწმინდად აგებს. ეს, რა თქმა უნდა, პირველ რიგში, არის ჩვენი სახელოვანი, მშრომელი ემიგრაცია, რომელიც საკუთარი ქვეყნიდან ლტოლვილებად აქცია ბიძინა ივანიშვილმა და დღეს ცდილობენ, რომ ამ ხალხს არჩევნებში მონაწილეობის უფლება წაართვან.

ჩვენთან შემოვიდა ინფორმაცია, რომ ისრაელში, სადაც ერთადერთი საარჩევნო უბანი გაიხსნა, ცდილობენ, რომ არჩევნებში მონაწილეობის უფლება საქართველოს 2 000-ზე მეტ მოქალაქეს წაართვან, ვინც ამ უბანზეა დარეგისტრირებული. ეს ხდება მიზანმიმართული საბოტაჟის გზით, როდესაც კომისიაში „ქართული ოცნების“ წარმომადგენლები აპირებენ, რომ არჩევნების დღეს არ აპირებენ გამოცხადდნენ არჩევნების ჩასატარებლად.

მე მაქვს ინფორმაცია, რომ ამ სპეცოპერაციას საქართველოს მოქალაქეების და ამ ქვეყნის დემოკრატიული მომავლის წინააღმდეგ ხელმძღვანელობს საქართველოს ყოფილი ელჩი ისრაელში, ლაშა ჟვანია. მე მინდა შევახსენო მას და ყველა სხვას, რომ საბოტაჟი და არჩევნების ხელისშეშლა არის სისხლის სამართლის დანაშაული. ამ ქვეყანას 27 ოქტომბრიდან ეყოლება ახალი ხელისუფლება. ხელისუფლება, რომელიც არამხოლოდ დააბრუნებს საქართველოს ევროპული განვითარების გზაზე, არამედ დააბრუნებს საქართველოში კანონის უზენაესობას და პასუხი მოეთხოვება ყველას, ვინც დღეს ან ხვალ შეეცდება, რომ ხელი შეუშალოს ქართველი ხალხის კონსტიტუციურ უფლებას, განახორციელოს თავისი საარჩევნო უფლებები“, — განაცხადა სამადაშვილმა.