რუსულმა ონლაინგაყიდვების კომპანიამ Wildberries საქართველოში საქონლის გაყიდვა დაიწყო, მიწოდების სერვისს ის ქართული კომპანიების მეშვეობით განახორციელებს.

როგორც ინტერფაქსი გაერთიანებული კომპანია Wildberries and Russ-ის პრესსამსახურზე დაყრდნობით იუწყება, ქართველ მომხმარებელს ექნება წვდომა საქონლის ფართო სპექტრზე, რომელიც მოიცავს 8 მილიონზე მეტ პროდუქტს სხვადასხვა კატეგორიებში: ტანსაცმელი, სილამაზისა და ჯანმრთელობის პროდუქტები, საყოფაცხოვრებო ტექნიკა. სარემონტო პროდუქტები, ბაღი და აგარაკი და სხვა.

„პირველ ეტაპზე ფრენჩაიზის მიმღებს შეკვეთა თბილისში მოაქვს, მისი მიწოდების დრო დაახლოებით 7 დღე იქნება. ასევე განიხილება კურიერის მიწოდების დაწყების შესაძლებლობა. ფრენჩაიზის მიმღები რეგიონში ლოგისტიკური ინფრასტრუქტურის გაფართოებას გეგმავს", — ნათქვამია პრესრელიზში.

სექტემბერში საქართველოში ფუნქციონირება დაიწყო რუსული ელექტრონული კომერციის პლატფორმა Ozon. მომხმარებელი შეკვეთილ საქონელს იღებს თბილისში, ბათუმში, ქუთაისში, ფოთში, ზუგდიდში, რუსთავში, ასევე ხაშურში, ბორჯომში, ამბროლაურში, ოზურგეთსა და სხვა.

Commersant წერს, რომ Wildberries-ის დამფუძნებელი და მმართველი, ტატიანა ბაკალჩუკი 2022 წლის ოქტომბერში უკრაინამ სანქცირებული 256 რუსი ბიზნესმენისა და მათი ოჯახის წევრების სიაში შეიყვანა.

ამას გარდა, 2022 წელს Wildberries იმ რუსულ კომპანიებს შორის მოხვდა, რომელთაც სანქციები პოლონეთმა დაუწესა.