ყოველთვის, როდესაც ჩვენს საყვარელ ფილმს ან სერიალს ვუყურებთ, გვინდება ის ნივთი ან სამახსოვრო ატრიბუტი გვქონდეს, რაც ამა თუ იმ პერსონაჟს უკავშირდება.

მაგალითისთვის ჰარი პოტერიც კმარა, შეუძლებელია დავითვალოთ იმ სუვენირების რაოდენობა, რომელიც ჯადოქრების სამყაროზე შექმნილი ბესტსელერის გამოსვლის დღიდან გაიყიდა - ცხადია, ამის დათვლა შეიძლება, მაგრამ იმის თქმა გვინდა, რომ ძალიან ბევრი გაიყიდა.

ანალოგიური შემთხვევა ეხება HBO-ს სერიალ სამეფო კარის თამაშებსაც. სხვადასხვა ნივთებთან ერთად, შოუს გამოსვლის დღიდან, პოპულარობას არ კარგავენ ჰასკები, ძაღლები, რომლებიც სერიალში ნაჩვენებ მგლებს ძალიან ჰგვანან.

ყველას სურს სახლში სტარკების საყვარელი ცხოველი ჰყავდეს, მაგრამ ავიწყდებათ, რომ ეს სუპერ საყვარელი ჰასკები სინამდვილეში გიგანტური მგლები სულაც არ არიან.

ფანები, რომლებსაც განსაკუთრებით უნდათ GOT-ის ფანტასტიკური სამყარო რეალურ სამყაროში გადმოიტანონ, ათასობით დოლარს ხარჯავენ ჰასკების შეძენაში, შემდეგ კი სხვადასხვა მიზეზებით მათ თავშესაფარში აბარებენ.

სწორედ ამიტომ, სერიალის მაყურებლებს ტირიონ ლანისტერის როლის შემსრულებელმა პიტერ დინკლიჯმა განსაკუთრებული თხოვნით მიმართა:

"სამეფო კარის თამაშების უამრავ არაჩვეულებრივ გულშემატკივარს, რომლებსაც სერიალში ნაჩვენები მგლების სახლში ყოლა სურთ და ამისთვის ჰასკებს ყიდულობენ, ვთხოვ, რომ ეს აღარ გააკეთონ, რადგან ამით უამრავ უსახლკარო ძაღლს ტკენენ გულს, რომლებიც საკუთარ შანსს ელოდებიან, ელოდებიან თავშესაფარს. მათ შორის არის ათასობით მიტოვებული ჰასკიც. ეს კი მხოლოდ იმ შემთხვევაში ხდება, როდესაც ადამიანები მათ ყიდულობენ არა მაშინ როდესაც ისინი სჭირდებათ, არამედ იმპულსების გამო. გთხოვთ, ძალიან გთხოვთ, რომ თუ ძაღლის მიყვანა გსურთ სახლში, დარწმუნდით თქვენს შესაძლებლობებში და ყოველთვის, ყოველთვის გახსოვდეთ, რომ ყიდვის ნაცვლად ისინი თავშესაფრიდან აიყვანოთ", ამბობს პიტერი.

ეს პირველი შემთხვევა არ არის, როდესაც ამ პრობლემაზე ხმამაღლა საუბრობენ, ცხოველთა უფლებების დამცველი ორგანიზაცია PETA დიდი ხანია ეხმაურება და ხშირად აღნიშნავს, რომ ფილმებისა თუ სერიალების გავლენით, დაუფიქრებლად ბევრი ადამიანი ყიდულობს სხვადასხვა ცხოველს, შემდეგ კი მათ თავშესაფარში ტოვებს. ამის მაგალითად მათ ჩიხუახუას ჯიშის ძაღლი მოჰყავთ, რომელიც ქერათმიანი ადვოკატის გამოსვლის შემდეგ განსაკუთრებით პოპულარული გახდა და მოუწოდებს ადამიანებს, რომ ყიდვის ნაცვლად თავშესაფრიდან წაიყვანონ ის ექვს მილიონზე მეტი ძაღლი და კატა, რომლებიც ამ წლების განმავლობაში სხვადასხვა მიზეზით მიატოვეს პატრონებმა.