მოლდოვაში 20 ოქტომბერს ჩატარებული საპრეზიდენტო არჩევნების და რეფერენდუმის წინასწარი შედეგები გამოაქვეყნა.

საპრეზიდენტო არჩევნების ბიულეტენების 98%-ის მეტის დათვლის შემდეგ, მოქმედ პრეზიდენტს, მაია სანდუს ამომრჩეველთა 41.98% უჭერს მხარს, მოლდოვის ყოფილ გენერალურ პროკურორს, სოციალისტ ალექსანდრე სტოიანოგლოს – 26.31%.

თუ ხმების სრულად დათვლის დასრულების შემდეგ მონაცემები არ შეიცვლება და ვერცერთი კანდიდატი ვერ მოაგროვებს 50 პროცენტზე მეტს, საპრეზიდენტო არჩევნების მეორე ტური 3 ნოემბერს გაიმართება.

არჩევნების წინასწარი შედეგების გამოქვეყნების შემდეგ, პრესკონფერენციაზე მაია სანდუმ განაცხადა, რომ კრიმინალურმა დაჯგუფებამ 300 000 ხმა მოისყიდა და დანაშაულებრივ დაჯგუფებებს დემოკრატიაზე უპრეცედენტო თავდასხმაში დასდო ბრალი.

"ძვირფასო მოქალაქეებო, დღეს, ისევე როგორც ბოლო თვეების განმავლობაში, მოლდოვაში თავისუფლება და დემოკრატია უპრეცედენტო თავდასხმის ქვეშ მოექცა. კრიმინალურმა დაჯგუფებებმა, უცხოურ ძალებთან გაერთიანებით, ტყუილითა და პროპაგანდით შეუტიეს ჩვენს ქვეყანას. ჩვენ გვაქვს მტკიცებულებები და ინფორმაცია, რომ კრიმინალურმა დაჯგუფებამ 300 000 ხმა მოისყიდა. ეს არის უპრეცედენტო თაღლითობა, რომლის მიზანია დემოკრატიის დისკრედიტაცია. მათი მიზანია საზოგადოებაში შიშისა და პანიკის დათესვა. ჩვენ არ შევწყვეტთ თავისუფლებისა და დემოკრატიის დაცვას. ჩვენ ველოდებით საბოლოო შედეგებს და დავბრუნდებით გადაწყვეტილებებით", – განაცხადა მაია სანდუმ.

20 ოქტომბერს, მოლდოვაში, საპრეზიდენტო არჩევნების პარალელურად, ევროკავშირში გაწევრიანების შესახებ რეფერენდუმიც ჩატარდა.

21 ოქტომბრის, დილის 10 საათის (თბილისის დროით) მონაცემებით, საკონსტიტუციო რეფერენდუმზე ბიულეტენების 98%-ია დათვლილი და ხმათა 50,08% ევროინტეგრაციის მომხრეა, ხოლო 49,92% — წინააღმდეგი.

საკონსტიტუციო რეფერენდუმზე მოქალაქეებმა უპასუხეს კითხვას: „უჭერენ თუ არა მხარს კონსტიტუციის შეცვლას მოლდოვის ევროკავშირში გაწევრიანების მიზნით?“