კომუნიკაციების კომისიამ კოალიცია ძლიერი საქართველოს საჩივრის საფუძველზე, პოლიტიკური რეკლამის განუთავსებლობისთვის სამთავრობო მედიები, იმედი და რუსთავი 2 საარჩევნო კოდექსის დამრღვევებად კიდევ ერთხელ ცნო და ადმინისტრაციული სამართალდარღვევის ოქმი შეუდგინა.

"კომუნიკაციების კომისიაში შემოვიდა პოლიტიკური გაერთიანება ძლიერი საქართველო - ლელო, ხალხისთვის, თავისუფლებისთვის საჩივარი, რომლის თანახმადაც, მიუხედავად ფასიანი პოლიტიკური რეკლამის განთავსების თაობაზე ტელევიზიასთან გაფორმებული ხელშეკრულებისა, ასევე, იმავე საკითხზე ComCom-ის და სასამართლოს მიერ მიღებული გადაწყვეტილებისა, რომლის ფარგლებშიც ორივე ტელევიზია საარჩევნო კოდექსის დამრღვევებად უკვე ცნეს, მაუწყებლები კვლავ არ ათავსებენ ძლიერი საქართველო - ლელო, ხალხისთვის, თავისუფლებისთვის მიერ მიწოდებულ ფასიან პოლიტიკურ რეკლამას.

საქართველოს საარჩევნო კოდექსის თანახმად, მაუწყებელი ვალდებულია ცესკოს და კომუნიკაციების კომისიას, კენჭისყრამდე არაუგვიანეს მე-60 დღიდან, 5 კალენდარული დღის ვადაში, გადასცეს ინფორმაცია ფასიანი წინასაარჩევნო რეკლამის განსათავსებლად საეთერო დროის ტარიფების შესახებ. ტარიფები ძალაში შედის 50-ე დღიდან. მაუწყებელი, რომელიც აქვეყნებს ტარიფს, ვალდებულია განათავსოს მისთვის წარდგენილი ფასიანი რეკლამა, ხოლო არ განთავსების შემთხვევაში, ის დაარღვევს კანონს. ამასთან, კომუნიკაციების კომისიის მიერ შემუშავებული გზამკვლევის თანახმად, მაუწყებელმა უნდა დაიცვას დისკრიმინაციის აკრძალვის მოთხოვნა და თანასწორად უზრუნველყოს ყველა მსურველი საარჩევნო სუბიექტის მიერ სათანადოდ წარდგენილი ფასიანი პოლიტიკური რეკლამის განთავსება.

კომუნიკაციების კომისიამ შესწავლილი გარემოებებიდან გამომდინარე მიიჩნია, რომ რუსთავი 2-ისა და ტელეიმედის მიერ დარღვეულია საქართველოს საარჩევნო კოდექსი, შესაბამისად, აღნიშნული ტელევიზიები სამართალდამრღვევებად ცნო და მათ სამართალდარღვევათა ოქმი შეუდგინა". — წერს კომუნიკაციების კომისია.