რუსთავი 2-ზე გიორგი გაბუნიას გადაცემაში ახალი პარტიის სახელმწიფო ხალხისთვის ლიდერმა პაატა ბურჭულაძემ ქიბარ ხალვაშს მიმართა და სთხოვა, რომ არჩევნებამდე უზენაესი სასამართლოში განსახილველი რუსთავი 2-ის პროცესი არ დააჩქაროს:

"გამოიჩინეთ ვაჟკაცობა, სამშობლოს სიყვარული და მისთვის თავდადებულობა და მიმართეთ უზენაეს სასამართლოს არჩევნებამდე თავი შეიკავოს, ნუ გადაწყვეტს ამ საკითხს [რუსთავი 2-ის საქმეს]. მითუმეტეს, რომ უზენაეს სასამართლოს აქვს 3 თვე გადაწყვეტილების მისაღებად. ეს ერთი თვე სანამ შევა საჩივარი და ის 3 თვე ზუსტად საკმარისია იმისთვის, რომ არჩევნები ჩატარდეს, ევროპამ შემოგვხედოს, რომ ჩვენ ვართ ნორმალური ქვეყანა და ჩვენთან არ დევნიან მედიას".

სახელმწიფო ხალხისთვის ლიდერმა თქვა, რომ თუ ქიბარ ხალვაში ამდენი წელი არ ფლობდა რუსთავი 2-ს, არჩევნებამდე დარჩენილი 4 თვეც "მოითმინოს".

ნიკა გვარამიამ 10 ივნისს განაცხადა, რომ რომ რუსთავი 2 ელოდება საკონსტიტუციო სასამართლოს გადაწყვეტილებას, დაწერს საკასაციო საჩივარს და იმედს იტოვებს, რომ უზენაესი სასამართლო ღირსეულად გაუმკლავდება ამ გამოწვევას.

თბილისის სააპელაციო სასამართლომ დღეს, 10 ივნისს, ძალაში დატოვა საქალაქო სასამართლოს მოსამართლის, თამაზ ურთმელიძის გადაწყვეტილება რუსთავი 2-ის წილების ქიბარ ხალვაშისთვის მიკუთვნებასთან დაკავშირებით.

თბილისის სააპელაციო სასამართლომ რუსთავი 2-ის საქმის განხილვა 7 ივნისს დაასრულა.