რუსთავი 2-ის გენერალურმა დირექტორმა, ნიკა გვარამიამ საგანგებო ბრიფინგი გამართა და განმარტა, რომ სააპელაციო სასამართლოს მიერ დღეს მიღებული გადაწყვეტილება მისთვის გასაკვირი არ იყო და ის უარეს შედეგსაც კი ელოდა. მისი განმარტებით, რუსთავი 2 გეგმავს ზუსტად იმავე რიტმში გააგრძელოს მუშაობა, როგორსაც აღნიშნული სასამართლოს დაწყებამდე მუშაობდა:

"ორშაბათიდან ჩვენ დავიწყებთ სრულფასოვნად წინასაარჩევნო კამპანიის, მთავრობის და არა მხოლოდ მთავრობის მოღვაწეობის გაშუქებას. ნაკლებს ვისაუბრებთ ამ საქმეზე თუ, რა თქმა უნდა, ახალი დეტალები არ გამოიკვეთა".

გვარამიამ ასევე განმარტა, რომ რუსთავი 2 ელოდება საკონსტიტუციო სასამართლოს გადაწყვეტილებას, დაწერს საკასაციო საჩივარს და იმედს იტოვებს, რომ უზენაესი სასამართლო ღირსეულად გაუმკლავდება ძალიან მნიშვნელოვან გამოწვევას, რომელიც არა მხოლოდ მის წინაშე, არამედ მთელი ქვეყნის წინაშე დგას:

"ის რაც ჩვენ დღეს ვნახეთ, შეუნიღბავი კატასტროფა იყო - მესამე დღეს, ასეთ რთულ საქმეზე სამწუთიანი გადაწყვეტილების გამოცხადება, საერთოდ არ უმსჯელია სასამართლოს არაკვალიფიციური მოსამართლის აცილებაზე. ასევე, როგორც აღმოჩნდა, კოლეგიის თავდჯომარეს, ნაზღაიძის გასდის გამოსაცდელი ვადა სამწლიანი ნოემბერში და როგორც ჩანს, ის შემსრულებელია ამ ყველაფრის იმ მოტივით, რომ ჰგონია, რომ დანიშნავენ, მაგრამ ვპირდებით მას, რომ არასდროს ის მოსამართლედ აღარ გამწესდება. და სხვათა შორის მთელი ის კრიტიკა, რომელსაც არასამთავრობო სექტორი და საერთაშორისო ექსპერტები ამბობდნენ გამოსაცდელ ვადასთან დაკავშირებით, რომ ამის შედეგად ჩვენ მივიღებდით მართულ მოსამართლეებს, რუსთავი 2-ის საქმემ და ქალბატონი ნაზღაიძის გადაწყვეტილებამ კიდევ ერთხელ დაადასტურა".

თბილისის სააპელაციო სასამართლომ დღეს, 10 ივნისს, ძალაში დატოვა საქალაქო სასამართლოს მოსამართლის, თამაზ ურთმელიძის გადაწყვეტილება რუსთავი 2-ის წილების ქიბარ ხალვაშისთვის მიკუთვნებასთან დაკავშირებით.

თბილისის სააპელაციო სასამართლომ რუსთავი 2-ის საქმის განხილვა 7 ივნისს დაასრულა.