არჩევნების მოახლოებასთან ერთად, "ქართული ოცნების" პროპაგანდისტული მანქანა სულ უფრო ძლიერდება და უკვე ხშირად ვხედავთ მინის "აკვარიუმით" მოძრავ ბიძინა ივანიშვილს. ერთ-ერთი ასეთი შეხვედრისას, როცა ივანიშვილი ქართველ მოსახლეობას საგულდაგულოდ შემინული ტრიბუნიდან მიმართავდა, ახსენა, რომ 12 წელი (ანუ, ის დრო, რაც "ოცნებამ" საქართველოს სამართავ სადავეებთან გაატარა) სულაც არაა საკმარისი ქვეყნის გარდაქმნისა და გრანდიოზული ცვლილებებისათვის. მისი თქმით, მსგავს ტრანსფორმაციას მინიმუმ 25-30 წელი სჭირდება.

ბიძინა ივანიშვილის ფრაზამ ძალიან დაგვაფიქრა და გადავწყვიტეთ, სხვადასხვა ქვეყნის მიერ განხორციელებულ ძირფესვიან ცვლილებებზე ინფორმაცია მოგვეძიებინა. შედეგებმა გაგვაოცა და თქვენც გაგიზიარებთ:

1. სამხრეთ კორეის ეკონომიკური სასწაული (1997-2008)

1997 წელს, როცა აზიაში მძიმე ეკონომიკური კრიზისი მძვინვარებდა, სამხრეთ კორეამ პოზიციების აღდგენა მთავრობის ჭკვიანური გადაწყვეტილებების წყალობით მალევე შეძლო. 2008 წლისთვის მას ტექნოლოგიის, ავტომობილებისა და ელექტრონული მოწყობილობების ბიზნესების (სამსუნგი, ჰიუნდაი...) წყალობით მთავრობამ რეფორმები დანერგა, რომელმაც ქვეყანა საერთაშორისო ეკონომიკურ ძალად ათ წელზე ნაკლებ დროში აქცია.

2. ჩინეთის ჩქაროსნული მატარებლების სისტემა (2008-2018)

ჩინეთმა მსოფლიოში უდიდესი ჩქაროსნული მატარებლების სისტემა 10 წელზე ნაკლებ დროში ააშენა, რამაც მოსახლეობას ქვეყნის შიგნით გადაადგილება ძალიან გაუმარტივა. 2018 წლისთვის, ჩინეთში დაგებული ლიანდაგების სიგრძე 29 000 კილომეტრზე მეტი იყო. ამ გეგმამ ქვეყნის ეკონომიკაზე უდიდესი, დადებითი გავლენა მოახდინა და მილიონობით ადამიანს შეუმცირა მოგზაურობაზე დახარჯული დრო.

3. ჩილეს რეკონსტრუქცია 8.8-ბალიანი მიწისძვრის შემდეგ (2010-2014)

2010 წელს ჩილეს გამანადგურებელი, 8.8-ბალიანი მიწისძვრა დაატყდა თავს, რომელმაც ქვეყანაში მშენებლობისა და ეკონომიკის უსერიოზულესი პრობლემები წარმოშვა. ჩილეს მთავრობამ ამ გამოწვევას აღსანიშნავი სისწრაფითა და ეფექტურობით უპასუხა. სულ რაღაც 4 წელში ქვეყნის ინფრასტრუქტურა სრულიად აღდგა — სკოლები, საავადმყოფოები, აეროპორტები, სახლები...

4. ვიეტნამის ეკონომიკური განვითარება (2010-2020)

ვიეტნამის მთავრობამ ათ წელზე ნაკლებ დროში შეძლო ეკონომიკური კურსის არჩევა და უდიდესი წარმატების მიღწევა. 2010 წლისთვის ვიეტნამმა მწარმოებელი ქვეყნის ნიშა დაიკავა და რამდენიმე წელში მსოფლიოს უდიდეს მიმწოდებლად ქცევა, უცხოური ინვესტიციის მოზიდვა და ინდუსტრიალიზაციის გაზრდა შეძლო, რამაც მის მილიონობით მცხოვრებს კეთილდღეობა და დოვლათი მოუტანა.

როგორც ვხედავთ, "სოფლის" შენებას 25 და 30 წელი კი არა, ბიუჯეტის მიზნობრივი ხარჯვა, ქვეყნისადმი თავდადება და ექსპერტიზა სჭირდება. ამ ღირებულებების მქონე მთავრობას კი თვალსაჩინო წარმატების მისაღწევად 12 წელიც კი არ სჭირდება.