რუსეთის პრეზიდენტმა, ვლადიმერ პუტინმა ხელი მოაწერა განკარგულებას საქართველოს მოქალაქეებისთვის უვიზო რეჟიმის გაფართოების შესახებ, — ინფორმაციას რუსული მედია ავრცელებს.

დადგენილება ძალაში გამოქვეყნების მომენტიდან — 10 ოქტომბრიდან შედის.

განკარგულების თანახმად, საქართველოს მოქალაქეებს, მათ შორის სტუდენტებსა და სამუშაოდ ჩასულებს, რუსეთში 90 დღეზე მეტი დროით ყოფნის უფლება აქვთ. მანამდე, სამუშაო ან სასწავლო მიზნით რუსეთის ტერიტორიაზე ჩასულ საქართველოს მოქალაქეებს 90 დღეზე მეტი ვადით დარჩენის უფლება არ ჰქონდათ. რუსული მედია წერს, რომ საქართველოს მოქალაქეებს ვიზების აღება აღარ მოუწევთ და პირადობის დამადასტურებელი დოკუმენტით შეძლებენ რუსეთის ფედერაციაში შესვლას.

აღნიშნული ცვლილებები შედის იმ განკარგულებაში, რომელიც 2023 წლის გაზაფხულზე გამოქვეყნდა და რომლითაც რუსეთმა საქართველოს მოქალაქეებისთვის სავიზო რეჟიმი გააუქმა.