დღეს, 10 ოქტომბერს, ისრაელში მცხოვრები ქართველების მიერ აქცია გაიმართება, სადაც მოითხოვენ, რომ არ გაუქმდეს ისრაელში გახსნილი საარჩევნო უბანი.

აქცია 9 ოქტომბერს დაიგეგმა, როდესაც ცნობილი გახდა, რომ საომარი ვითარების ფონზე ცესკო ისრაელში საარჩევნო უბნის გაუქმებას გეგმავს.

"ჩვენ საგარეო საქმეთა სამინისტრომ მიმდინარე წლის 8 ოქტომბერს წერილობით მოგვმართა, აქ არის ინფორმაცია იმ გარემოებების შესახებ, იმ რისკების შესახებ, რომელიც უკავშირდება ისრაელში, თელ–ავივში, ქალაქ რამათ განში შექმნილ საარჩევნო უბანთან დაკავშირებულ საკითხებს. აღწერილია ყველა ის გარემოება, რომელიც შესაძლოა, საყურადღებო იყოს კომისიისთვის საარჩევნო უბნის შენარჩუნებასთან ან გაუქმებასთან დაკავშირებით. რის თაობაზეც ჩვენ უახლოეს სხდომაზე გვექნება სათანადო მსჯელობა და კომისია მიიღებს შესაბამის გადაწყვეტილებას", — განაცხადა ცესკოს თავმჯდომარე ირაკლი კალანდარიშვილმა.

ისრაელში მცხოვრები საქართველოს მოქალაქე, ირაკლი მეტრეველი Facebook-ზე წერს, რომ თუ ქვეყანაში საარჩევნო უბანი დაიხურება, ეს იქ მყოფი ქართველებისთვის წინასაარჩევნო უფლების წართმევა იქნება.

"როგორც უკვე ყველამ ვიცით, საგარეო საქმეთა სამინისტრომ შეიტანა ცესკოში წერილი, რომელიც ითვალისწინებს ისრაელში მყოფ ქართველების საარჩევნო უფლებების წართმევას და საარჩევნო უბნის არ გახსნას! ეს არის ყველა კანონის დარღვევა! აქ არაა საჭიროება, რომ საომარი მდგომარეობის ფონზე არ ჩატარდეს არჩევნები, როცა აქაური არჩევნები და ღონისძიებები ტარდება ჩვეულ რეჟიმში! ამიტომ ხვალ ყველა მივალთ საელჩოსთან და გავაგებინებთ ჩვენს ხმას", — წერს ირაკლი მეტრეველი სოციალურ ქსელში.

გაცნობებთ, რომ ცესკო-ს მონაცემებით, ქვეყნის საზღვრებს გარეთ 60 უბანი 42 ქვეყანაში უნდა გაიხსნას, ხოლო ერთი ისრაელის ქალაქ რამათ განში.