ქართულმა ოცნებამ გუშინ, 7 ოქტომბერს, საარჩევნო პროგრამა წარადგინა. ღონისძიებას არ ესწრებოდნენ პარტიის საპატიო თავმჯდომარე ბიძინა ივანიშვილი და თავმჯდომარე ირაკლი ღარიბაშვილი.

პროგრამის პრეზენტაციას საქართველოს პრემიერმინისტრი, ქართული ოცნების საარჩევნო შტაბის ხელმძღვანელი, ირაკლი კობახიძე გაუძღვა.

ტრადიციულად, კობახიძის პრეზენტაციაში მოვისმინეთ პირობები, რომლებიც შეეხებოდა ეკონომიკას, ინფრასტრუქტურას, სოფლის მეურნეობას, ენერგეტიკულ სფეროს, განათლებას, ჯანდაცვას, კულტურას, სპორტს, თავდაცვასა და საგარეო პოლიტიკას.

კობახიძემ ისაუბრა ეკონომიკის ზრდაზე და თქვა, რომ 2028 წლისთვის საქართველოს ეკონომიკა, სულ მცირე, 130 მილიარდ ლარამდე გაიზრდება, რაც შესაბამისად ბიუჯეტის ზრდასაც გამოიწვევს — იმაზე, თუ როგორ მოხდება ეს, პრემიერს აღარ უსაუბრია.

პრემიერ-მინისტრმა საკუთარი პარტიის წინასაარჩევნო გეგმას "ამბიციური" უწოდა და ბიუჯეტის 50 მილიარდ ლარამდე ზრდა დააანონსა. ამავე "ამბიციური" გეგმის მიხედვით, პარტია ამომრჩეველს უმუშევრობის 4%-მდე შემცირებას დაჰპირდა.

პრეზენტაციაში მნიშვნელოვანი წილი ეჭირა ინფრასტრუქტურულ საკითხებსაც. კობახიძემ ისაუბრა თბილისი-ბათუმის დამაკავშირებელ ავტობანზე, ასევე, აზერბაიჯანისა და სომხეთის საზღვრებთან დამაკავშირებელი მაგისტრალების დასრულებაზე. აქვე გავიგეთ, რომ თბილისი-რუსთავის 4-ზოლიანი მაგისტრალის (მალე) დასრულება და ვაზიანში ახალი საერთაშორისო აეროპორტის მშენებლობა იგეგმება.

ალბათ, ყველაზე მნიშვნელოვანი დაპირება, რომელიც პრეზენტაციაში გაჟღერდა, ანაკლიის პორტს ეხება:

"იწყება ანაკლიის პორტის მშენებლობის სამუშაოები, გაფორმდა ხელშეკრულება ჩინურ-სინგაპურულ კონსორციუმთან, ასევე ბელგიური კომპანია დაიწყებს უშუალოდ პორტის გაღრმავებაზე მუშაობას. ამ პროექტის პირველი ფაზა 2029 წელს დასრულდება, პირველ გემებს ანაკლიის პორტი სწორედ 2029 წლისთვის მიიღებს. წელიწადში 600 000 კონტეინერი იქნება გამტარობა, 600 მილიონი დოლარის ინვესტიცია ჩაიდება მხოლოდ პირველ ფაზაში", — განაცხადა კობახიძემ

სოფლის მეურნეობაზე საუბრისას ირაკლი კობახიძემ უარყო ამ მიმართულებით არსებული პრობლემები. მან აღნიშნა, რომ ამ კუთხით ბიძინა ივანიშვილის დაპირება "ძალიან დიდი გადაჭარბებით შესრულდა" და სოფლის აღორძინება კვლავ დარჩება პარტიის ერთ-ერთ პრიორიტეტად.

წინასაარჩევნო დაპირებებში მნიშვნელოვანი წილი ეჭირა ხელფასების, პენსიებისა და სოციალური პაკეტების საკითხს. კობახიძის განცხადებით, პენსია 350-450 ლარამდე გაიზრდება და აშენდება ახალი რესპუბლიკური საავადმყოფო. ქართული ოცნება, არჩევნებში გამარჯვების შემთხვევაში, ხელფასის ზრდას დაჰპირდა საბავშვო ბაღების, სახელოვნებო და სპორტული სკოლების პერსონალს.

სოციალური მხარდაჭერის საკითხები ეხებოდა ქვეყნის თავდაცვასაც. ირაკლი კობახიძემ სამხედროებისა და პოლიციელების სოციალურ მხარდაჭერაზე ისაუბრა. მისი თქმით, 1000-ზე მეტი სამხედრო და ამდენივე პოლიციელი მომდევნო წლებში დაკმაყოფილდება ბინებით. პრეზენტაცია შეეხო ადგილობრივი სამხედრო მრეწველობის განვითარების გეგმასაც. კობახიძის თქმით, სამხედრო ბაზების განვითარებისა და მატერიალურ-ტექნიკური ბაზის განახლების პარალელურად, ჩაიდება ინვესტიციები ეროვნულ სამხედრო მრეწველობაში.

ბოლოს კი, რაც ყველაზე მნიშვნელოვანია, ირაკლი კობახიძემ დრო დაუთმო საგარეო ურთიერთობების საკითხსაც. მისი თქმით, ურთიერთობები უნდა "გადაიტვირთოს".

"უმნიშვნელოვანესი ეროვნული ამოცანაა აშშ-სთან და ევროკავშირთან ურთიერთობების გადატვირთვა. ჩვენ, ბუნებრივია, არ მოგვწონს ურთიერთობების ის მდგომარეობა, რომელიც გვაქვს. დარწმუნებული ვართ, მომავალ წელს, მას შემდეგ, რაც დასრულდება ომი უკრაინაში, შემხვედრი ნაბიჯებიც იქნება გადადგმული, რაც უზრუნველყოფს ურთიერთობების გადატვირთვას", — განაცხადა კობახიძემ

ქართული ოცნების საარჩევნო შტაბის ხელმძღვანელის თქმით, ნატოსთან ურთიერთობების გაღრმავება უმთავრესი პრიორიტეტია, რომელსაც დიდი მნიშვნელობა აქვს როგორც ეკონომიკური, ისე პოლიტიკური თვალსაზრისით. ასევე, კობახიძემ განაცხადა ისიც, რომ 2030 წლისთვის საქართველო კანდიდატ ქვეყნებს შორის ყველაზე მეტად იქნება მზად ევროკავშირში გასაწევრიანებლად.

ამის პარალელურად, შეგახსენებთ, რომ არაერთმა ევროპარლამენტარმა და მაღალი თანამდებობის პირმა პირდაპირ მიუთითა მმართველ პარტიას, რომ საქართველოს წინსვლა დასავლური ინსტიტუტებისკენ, შეჩერებულია. დღეს, 8 ოქტომბერს გერმანიის ელჩმა საქართველოში, პიტერ ფიშერმა განაცხადა, რომ არსებული კურსით საქართველო ევროკავშირში გაწევრიანებას ვერ შეძლებს.