თურქეთის პრეზიდენტმა, რეჯეფ თაიფ ერდოღანმა NBC News-თან ინტერვიუში განაცხადა, რომ NATO-ში უკრაინის მიწვევა არ არის საკითხი, რომელთან დაკავშირებითაც სიჩქარეა საჭირო. მისივე თქმით, აშშ-სა და ალიანსის ზოგიერთ ქვეყანას არ სურს, უკრაინა იყოს ნატო-ს წევრი.

"ეს არ არის ის საკითხები, რომლებიც უნდა დაჩქარდეს. და როდესაც ჩვენ ვიღებთ გადაწყვეტილებებს, ყოველთვის ვითვალისწინებთ ნატო-ს სხვა წევრი ქვეყნების პოზიციებს, ჩვენ განვიხილავთ ყველა შესაძლო საკითხს მოლაპარაკებების მაგიდასთან და შესაბამისად ვიღებთ საბოლოო გადაწყვეტილებას", – განაცხადა თურქეთის ლიდერმა.

ერდოღანმა ისიც თქვა, რომ რუსეთ-თურქეთის კავშირები გრძელდება და ეკონომიკურად ეს ურთიერთობები ყოველდღიურად ფართოვდება.

"ჩვენი ურთიერთობები რუსეთთან მრავალგანზომილებიანი, პოლიტიკური, ეკონომიკურია, ასევე დაკავშირებულია თავდაცვით ინდუსტრიასთან. ამ ურთიერთობებს მრავალი განზომილება აქვს, ჩვენი კავშირები გრძელდება და ეკონომიკურად ეს ურთიერთობები ყოველდღიურად ფართოვდება", – განაცხადა რეჯეფ თაიფ ერდოღანმა.