დღევანდელ ეპოქაში ქალები იმ პრობლემებზე ღიად საუბრობენ, რომლებსაც პატრიარქალურ მსოფლიოში წლების წინ ტაბუ ედო. მათ შორის გენდერული უთანასწორობა, სექსუალური შევიწროება, სექსიზმი ჰოლივუდში, ერთნაირი სამუშაოსთვის არათანაბარი ანაზღაურება და ა.შ.

ამერიკელმა მსახიობმა, ქლოი გრეის მორეცმა, Variety-სთან ინტერვიუში გაიხსენა, რომ 15 წლის ასაკში გადასაღებ მოედანზე ბევრი იტირა, როდესაც მისმა პარტნიორმა კაცმა მსახიობმა, წონის გამო გააკრიტიკა.

"ჩვენ ფილმში ერთმანეთი გვიყვარდა, მან კი მითხრა, რომ რეალურ ცხოვრებაში არასდროს შემხვდებოდა, რადგან მისთვის ზედმეტად დიდი ზომის ვიყავი. ეს ერთადერთი შემთხვევა იყო, როდესაც მსახიობის გამო გადასაღებ მოედანზე ვიტირე".

ქლოის მსახიობის ვინაობა არ გაუმხელია, თუმცა ამ გამოცდილებას საკმაოდ უარყოფითად აფასებს:

"მომიწია ამაზე არ მეფიქრა, გადაღებაზე დავბრუნებულიყავი და თავი მომეჩვენებინა, რომ ის მიყვარდა. ძალიან რთული იყო. მაშინ გავაცნობიერე, რომ არსებობენ ცუდი ადამიანები. მას ამის თქმის საჭიროება არ ჰქონია. მე მხოლოდ 15 წლის ვიყავი და ის კი 25-ის იყო. ასეთ რამეებს შეიძლება პატიობდე ადამიანებს, მაგრამ ადვილად ვერ ივიწყებ, ძალიან უსიამოვნო გამოცდილება იყო".

ფოტო: Chuck Zlotnick/AP

მორეცმა ჰოლივუდში არსებულ იმ სირთულეებზე ისაუბრა, რომლებსაც ქალები ყოველდღე აწყდებიან:

"ამას ყოველდღე ვეჯახები. გიწევს სულ მომართული იყო. სულ ვითხოვ, რომ კასტინგებზე შემიშვან, შანსი მომცენ, მე ვეცდები წარმატების მისაღწევად და მეცოდინება, რომ ჩემს მცდელობაში ყველაფერი ჩავდე. თუმცა თუ უბრალოდ შანსის გარეშეც კი არას მეუბნებიან, აღარ ვიცი მათ რა ვუპასუხო. თუმცა, როცა ერთი კარი იხურება, მეორე იღება და ამიტომ ამისთვის ბრძოლის გაგრძელება ყოველთვის ღირს".

მორეცმა მსახიობობა 7 წლის ასაკში დაიწყო. მან ახლახან დაასრულა ტილდა სუინტონთან Suspiria-ს რიმეიქის გადაღებები. ფილმი ეკრანებზე წლის ბოლოს გამოვა.