უკვე დიდი ხანია, რაც ტეილორ სვიფტი აქტიურ საჯარო ცხოვრებას ჩამოშორდა და მასზე ბევრი არაფერი ვიცით, თუმცა მომღერალი მალე ალაპარაკდება მის მიმართ განხორციელებულ შესაძლო სექსუალურ შევიწროებაზე.

ამერიკელი სუპერვარსკვლავი დენვერის სასამართლოს ჩვენებას მისცემს, მას შემდეგ, რაც KYGO რადიოს ყოფილმა DJ-მ, დევიდ მიულერმა მას უჩივლა.

მიულერის თქმით, მან სამსახური მას შემდეგ დაკარგა, რაც სვიფტმა ის კულისებში სექსუალური ხასიათის თავდასხმაში დაადანაშაულა.

სვიფტი აცხადებს, რომ 2013 წელს, მისი ერთ-ერთი კონცერტის დროს, მიულერმა მას ფოტოს გადაღებისას კაბა აუწია და ხელი უკანალზე წაავლო. მომღერალი მაშინ 23 წლის იყო. მისი თქმით, ის თავდასხმაზე ესაუბრა თავის გუნდსა და დედას, ანდრეა სვიფტს, თუმცა უარყოფს, რომ მიულერის დამსაქმებელს მისი გათავისუფლება მოსთხოვა.

სვიფტის გუნდი აცხადებს, რომ KYGO-მ მიულერი კონტრაქტში გაწერილი მორალური პირობების დარღვევის გამო გაათავისუფლა, მათ შორის იყო მომღერლის მიმართ შეუფერებელი საქციელი, ინციდენტის შესახებ ტყუილი და ყალბი ისტორიის შექმნა. მით უმეტეს, რომ თავად მიულერს თავისი სამსახურისთვის არ უჩივლია, "კონტრაქტის დარღვევის გამო".

მიულერი კი ირწმუნება, რომ ის მას შემდეგ გაათავისუფლეს, რაც სვიფტის რადიო პრომოუშენის დირექტორმა, ფრანკ ბელმა, მის სამსახურში დარეკა და განაცხადა, რომ სვიფტი და მისი მშობლები KYGO-სგან კონკრეტულ ქმედებებს ელოდნენ.

სასამართლო დენვერში 7 აგვისტოსაა ჩანიშნული. ჩვენებას ტეილორ სვიფტი, დედამისი და ფრანკ ბელი მისცემენ.

მიულერმა სვიფტს პირველად 2015 წელს უჩივლა. სწორედ ამის შემდეგ შეიტანა სვიფტმა პირველი საჩივარი მის წინააღმდეგ.

2017 წლის მაისში, მოსამართლემ მიულერის ბრალდებები სვიფტის მიმართ ცილისწამებად შეაფასა. ასევე გარკვეული სანქციები დაუწესა იმ ელექტრონული მოწყობილობების განდაგურებისთვის, რომლებიც საქმის მთავარი მტკიცებულებებს შეიცავდა.