ამერიკელმა მსახიობმა და მომღერალმა დემი ლოვატომ თავისი სადებიუტო სარეჟისორო ნამუშევარი, დოკუმენტური ფილმი Child Star (ვარსკვლავი ბავშვი), გამოუშვა. Hulu-ზე განთავსებულ საათნახევრიან ფილმში ლოვატო თავის გამოცდილებასაც გვიზიარებს და ესაუბრება სხვა ცნობილ ადამიანებს, რომლებმაც პოპულარობა ასევე ადრეულ ასაკში მოიპოვეს. დოკუმენტურ ნამუშევარში მონაწილეობენ ქრისტინა რიჩი, დრიუ ბერიმორი, რეივენ-სიმონი, ჯოჯო სივა და სხვები.

ოფიციალური აღწერის მიხედვით, ლოვატო თავის სარეჟისორო დებიუტში გვიყვება საზოგადოების ყურადღების ცენტრში გაზრდის დადებით და უარყოფით მხარეებზე. აქამდე ვერ მოვიდოდი, ყველა ეს გადაწყვეტილება რომ არ მიმეღო, მაგრამ ამას თავისი საფასური აქვსო, ამბობს თავად მსახიობი ფილმის ტრეილერში.

"პოპულარობა ბავშვს არასტაბილურობას სძენს", — აღნიშნავს ლოვატო, — "მაგრამ როცა ეს უკვე მანამდე არსებულ არასტაბილურობას ერწყმის, ნამდვილი კატასტროფის რეცეპტი ხდება".

ლოვატო ტელეეკრანებზე 10 წლის ასაკში, სერიალ Barney & Friends-ში გამოჩნდა, მოგვიანებით კი, ადრეულ ასაკში დაწყებული კარიერა დისნეის არხზე გააგრძელა. დღეს უკვე პოპვარსკვლავად ქცეულ ლოვატოს აქამდეც არაერთხელ უსაუბრია ცნობადობის საზიანო მხარეზე, მათ შორის, გაუმახვილებია ყურადღება მენტალური ჯანმრთელობის პრობლემებსა და ადიქციაზე, რომლებთან გამკლავებაც თავად მოუხდა.

ამ საკითხის პრობლემურობას დემის თაობის სხვა ვარსკვლავებიც შეხებიან. გასულ წელს, მაგალითად, მაილი საირუსმა გამოაქვეყნა დატვირთული, 12-საათიანი სამუშაო დღის გრაფიკი, რომელიც მოზარდობისას ჰქონდა.

CNN-თან ინტერვიუში ლოვატომ ასევე იმედი გამოთქვა, რომ მისთვის ასე მნიშვნელოვან თემაზე ცნობიერების ამაღლებას შეძლებს და მოითხოვს კანონმდებლობის გამკაცრებას, რომელიც არასრულწლოვანებს სათანადოდ დაიცავს.

ასევე იხილეთ: