მას შემდეგ, რაც უკრაინელმა მფრინავმა, ნადეჟდა სავჩენკომ თავისი ადგილი დაიკავა უმაღლეს რადაში, განაცხადა, რომ ქვეყანაში ვადამდელი საპარლამენტო არჩევნების ჩატარება აუცილებელია. მისი თქმით, უკრაინის პოლიტიკური ცხოვრება განახლებას საჭიროებს. ამის შესახებ ინფორმაციას EkhoKavkaza ავრცელებს.

"უკრაინელი ხალხი იმსახურებს იმაზე უკეთეს ხელისუფლებას, ვიდრე მას ახლა ჰყავს" - განაცხადა სავჩენკომ და განმარტა, რომ ამჟამინდელმა ხელისუფლებამ მოქალაქეების იმედები ვერ გაამართლა.

7 ივნისს სავჩენკომ ასევე თქვა, რომ მზად არის აღმოსავლეთ უკრაინაში სეპარატისტებთან მოლაპარაკებები აწარმოოს იმისთვის, რომ მოიძებნოს გზა შეიარაღებული კონფლიქტის დასრულებისთვის, რომელიც უკვე 2 წლის განმავლობაში მიმდინარეობს.

სავჩენკომ ასევე განმარტა, რომ სეპარატისტების ლიდერებთან პირდაპირი მოლაპარაკებები შესაძლოა უფრო ეფექტური აღმოჩნდეს, ვიდრე ახლანდელი, რომელშიც მონაწილეობას რუსეთი, უკრაინა, გერმანია და საფრანგეთი იღებენ.

ნადეჟდა სავჩენკო უკრიანაში 25 მაისს, რუსეთსა და უკრაინას შორის მოლაპარაკებების შედეგად დაბრუნდა.

რუსულმა მხარემ ის 2014 წელს წელს დააკავა და ბრალად რუსი ჟურნალისტების, იგორ კორნელიუკისა და ანტონ ვოლოსინის, მკვლელობა დასდო. ამ დროის განმავლობაში სავჩენკო ბრალდებას უარყოფს და ამტკიცებს, რომ მის ირგვლივ განვითარებული პროცესებს პოლიტიკური სარჩული აქვს. მისი განმარტებით, 2014 წლის ივნისში აღმოსავლეთ უკრაინაში მას შემდეგ შეიპყრეს, რაც რუსი ჟურნალისტები უკვე დახოცილები იყვნენ.

რუსულმა მხარემ სავჩენკო დამნაშავედ ცნო და 22 წლიანი პატიმრობა მიუსაჯა.

20 აპრილს უკრაინა და რუსეთი ნადია სავჩენკოსა და უკრაინაში გასამართლებული რუსეთის მოქალაქეების გაცვლაზე შეთანხმდნენ.