ექიმის და სამედიცინო ასოციაციის პრეზიდენტის, მანანა ჯებაშვილის თქმით, საქართველოს მესამე პრეზიდენტის, მიხეილ სააკაშვილის მდგომარეობა მძიმე და "სიცოცხლისთვის საშიშია".

ჯებაშვილის თქმით, სააკაშვილის სატურაციამ იმის შემდეგ დაიწია, რაც ყოფილი პრეზიდენტი სხვა პალატაში გადაიყვანეს.

“დაახლოებით თვე-ნახევრის წინ მიხეილ სააკაშვილი გადაიყვანეს სხვა პალატაში. სხვა პალატაში გადაყვანიდან მეორე დღესვე მას აღენიშნებოდა ერთ-ერთი მნიშვნელოვანი სასიცოცხლო პარამეტრის, სატურაციის დაცემა. ის მიუახლოვდა ქვედა დონეს, რაც მისი სიცოცხლისთვის საშიშია" — ამბობს ჯებაშვილი.

მანვე განაცხადა, რომ მათთვის უცნობია, თუ რამ გამოიწვია დაბალი სატურაცია და დასძინა, რომ ოჯახი უკვე თვე-ნახევარია ამ მონაცემების გასწორებას ელოდება.

როგორც ჯებაშვილი იუწყება, შეხვედრას კოლეგებთანაც ითხოვენ, რომ გაარკვიონ თუ რატომ ვერ მოხერხდა თვე-ნახევრის განმავლობაში პარამეტრების კორექტირება და რა მკურნალობა ჩაუტარდა ამისთვის.

" მიხეილ სააკაშვილს ბოლო პერიოდში აქვს ძლიერი სისუსტე, ძილიანობა, ჰაერის უკმარისობა და სხვა. სატურაციაც ისევ დაბალია, 90-91-ის ფარგლებში. ამდენად, ჩვენ გვაინტერესებს თვე-ნახევრის განმავლობაში რატომ ვერ მოხდა ამ პარამეტრის კორექტირება და რაშია საქმე, რატომ არის სასიცოცხლოდ მნიშვნელოვანი მაჩვენებელი ასეთი დაბალი, რამ გამოიწვია იგი და რა მკურნალობა ჩაუტარდა ამისთვის" — განმარტა მან.

ექიმის თქმით, სააკაშვილის სატურაციის შემოწმების პროცესს დედა — გიული ალასანია ესწრება, ინფორმაციაც აქედან აქვთ.

საუბარი იყო სახალხო დამცველთან შეხვედრაზეც, რომელიც მათ კონსილიუმის შეკრებას და მიზეზის გარკვევას დაჰპირდა, თუმცა ამას "გარკვეული დრო სჭირდება".

"(მიხეილ სააკაშვილი) როცა ძალიან ცუდად იყო, მისი სატურაცია იყო მინიმუმ 97. ეს თვე-ნახევარია ეს სასიცოცხლოდ მნიშვნელოვანი პარამეტრი დაუვარდა. ამდენად, ძალიან საინტერესოა რამ გამოიწვია და რა მკურნალობა უტარდება ამისთვის”, - განაცხადა ჯებაშვილმა.