ჩინური კომპანია — China Huadian Corporation, რომელიც ლევან დავითაშვილმა საქართველოში მოიწვია, საეჭვო რეპუტაციისაა, – ამის შესახებ ინფორმაციას სამოქალაქო იდეა ავრცელებს.

მათი ცნობით, China Huadian Corporation-ის საკრედიტო რეიტინგს საერთაშორისო კომპანია Fitch-ი აფასებს , როგორც "ნეგატიურს". ეს იმას ნიშნავს, რომ კომპანია არასტაბილური საკრედიტო გამოწვევების წინაშე დგას და შესაძლოა დავალიანების დაფარვის პრობლემების გამო დეფოლტი განიცადოს.

ამას გარდა, 2024 წლის რეიტინგი ESG (გარემოსდაცვითი, სოციალური და მმართველობითი საზომი) მას აფასებს, როგორც "მძიმედ სარისკოს". ნეგატიურად აფასებს კომპანიას S&P Global-იც, რომელიც საკუთარი საერთაშორისო საზომების მიხედვით, ბრალს სდებს მას გამჭვირვალობის ნაკლებობისა და მდგრადობისადმი არასაკმარისი ძალისხმევის გამო.

Reuters-ის ცნობით, დისციპლინური ინსპექციის ცენტრალურმა კომისიამ CHD დაადანაშაულა ქვანახშირის მაღაროებზე მონოპოლიის აღებისას გამოვლენილ სერიოზულ დარღვევებსა და თანამდებობის პირების ნეპოტიზმით დანიშვნაში. გავრცელებული ინფორმაციით, ამ ქმედებებმა გამოიწვია სახელმწიფო საკუთრებაში არსებული აქტივების მნიშვნელოვანი ზარალი და შეარყია ჩინეთის ენერგეტიკული სექტორის მთლიანობა.

"პარადოქსია ის, რომ ეკონომიკის სამინისტროში გამართულ გუშინდელ შეხვედრაზე ამ ახალი თანამშრომლობის მარკეტირება მოხდა ისე, თითქოს, China Huadian Corporation ხელს შეუწყობს საქართველოში ენერგიის ტექნოლოგიების განვითარებას. თუმცა რეალობა ცხადყოფს, რომ მრავალი კანონდარღვევის შემთხვევის გარდა, ვერც მისი მდგრადობისა და უსაფრთხოების რეპუტაცია ამართლებს თანამშრომლობის ტრაფარეტულ პირობებს. ამ დარღვევების ფონზე, შეგვიძლია ვთქვათ, რომ საქართველოს მთავრობა კვლავ არ იჩენს საკმარის პასუხისმგებლობას და ანგარიშვალდებულებას ჩინურ კომპანიებთან მიმართებით", — ნათქვამია სამოქალაქო იდეას მიერ გავრცელებულ განცხადებაში.

ცნობისათვის, ეკონომიკის სამინისტროს ინფორმაციით, 12 სექტემბრის შეხვედრაზე აღინიშნა, რომ საქართველო, რომელსაც განახლებადი ენერგიის წყაროების დიდი რესურსი აქვს, დაინტერესებულია, ითანამშრომლოს ჩინურ ენერგეტიკულ კომპანიებთან.

"სამოქალაქო იდეა" საქართველოში დაფუძნებული არასამთავრობო ორგანიზაციაა, რომელიც ბოლო ხუთი წელია იკვლევს და აკვირდება ჩინეთის საქმიანობას საქართველოში. ორგანიზაციის თავმჯდომარეა თინათინ ხიდაშელი.