შუქრუთელები თბილისში, პარლამენტის წინ აქციას მართავენ. აქციის მონაწილეები ჯორჯიან მანგანეზის საქმიანობის შედეგად სოფელ შუქრუთისთვის მიყენებული ზარალის ანაზღაურებას და პროცესში ცენტრალური ხელისუფლების ჩართვას ითხოვენ.

აქციის მონაწილეების ტრანსპარანტებზე ვკითხულობთ: "სოფელ შუქრუთის გადასარჩენად", "ნუ გვინგრევთ სახლებს, ნუ გვაქცევთ ლტოლვილებად", "სოლიდარობა შუქრუთს".

"ვითხოვთ, სახელმწიფო ჩაერიოს ამ პრობლემის გადაჭრაში, რომ არ დავრჩეთ საქართველოში ლტოლვილებად, არ ჩამოგვენგრეს თავზე სალოცავები, მიცვალებულთა საფლავები და ოჯახები. იქამდე გავაგრძელებთ პროტესტს, სანამ სამართალი არ აღდგება", — აცხადებს აქციის ერთ-ერთი მონაწილე სიტყვით გამოსვლისას.

ისინი მთელ საქართველოს სთხოვენ გვერდში დგომას და სურთ ყველას დაუმტკიცონ თავიანთი სიმართლე.

"ჩვენ მარტო სახლები კი არ გვენგრევა, მორალურადაც ვზიანდებით. ვითხოვთ მხოლოდ და მხოლოდ სამართლიანობის აღდგენას", — აცხადებენ შუქრუთელები.

შუქრუთელების პროტესტს შეუერთდნენ ევოლუშენის თანამშრომლები, რომლებიც ადეკვატური შრომითი პირობების და ხელფასის ზრდის მოთხოვნით არიან გაფიცულები.

მაღაროელების უწყვეტი პროტესტი უკვე 183 დღეა გრძელდება. მეთერთმეტე დღეა, რაც 5 მათგანს პირი აქვს ამოკერილი. მათი მთავარი მოთხოვნა, კომპანიის მხრიდან კომპენსაცია და უსაფრთხო საცხოვრებელი პირობების შექმნაა. აქციის მონაწილეების თქმით, მარგანეცის მოპოვებითი სამუშაოების გამო სახლებს ქვევით მიწა მთლიანად გამოცლილია, შენობები დანგრევის პირასაა, ჭები შრება და მოსავალი არ მოდის.

კომპანია ბრალდებებს უარყოფს და რამდენჯერმე უჩივლა პროტესტის მონაწილეებს, რომ ხელი არ შეუშალონ მანგანუმის მოპოვებაში. ამას გარდა, ისინი ზარალის ანაზღაურებისთვის გაფიცულებისგან 5 500 000 ლარის გადახდას ითხოვენ. საჩხერის რაიონულმა სასამართლომ პროტესტის მონაწილე სამ პირს კი 1000-1000-ლარიანი ჯარიმა დააკისრა.