შუქრუთელები თბილისში, პარლამენტის წინ აქციას მართავენ. ისინი ჯორჯიან მანგანეზის საქმიანობის შედეგად სოფელ შუქრუთისთვის მიყენებული ზარალის ანაზღაურებას და პროცესში ცენტრალური ხელისუფლების ჩართვას ითხოვენ.

შუქრუთელების პროტესტს შეუერთდნენ ევოლუშენის გაფიცული თანამშრომლები, რომლებიც ადეკვატური შრომითი პირობების და ხელფასის ზრდის მოთხოვნით არიან გაფიცულები.

ევოლუშენის გაფიცული თანამშრომელი, თამარ ანსიანი აცხადებს, ორივე პროტესტს ბევრი საერთო აქვს. მთავარი კი ის არის, რომ ორივე პროტესტი წაყრუებულია ხელისუფლების მხრიდან. მისი თქმით ეს ყველაფერი გვაშორებს იმას, რისთვისაც ვიბრძვით და რაც გვაერთიანებს — ევროპულ მომავალს.

"ამ წუთას ჩვენს მოქალაქეობრივ ვალდებულებას ვასრულებთ. ვგრძნობთ პასუხისმგებლობას შუქრუთელების წინაშე და ვდგავართ იქ, სადაც უნდა იდგეს ნებისმიერი მოქალაქე, არ აქვს მნიშვნელობა პირადად მას ეხება თუ არა ეს პრობლემა. ძალიან ბევრი საერთო აქვს ამ პროცესებს ევოლუშენის პროცესებთან. სხვადასხვა ტიპის პროტესტები მიმდინარეობს, მაგრამ ბევრი რამ აერთიანებს — ორივე პროტესტი წაყრუებული და დაიგნორებულია ხელისუფლების მხრიდან. ამ დროს ხელისუფლებას აქვს პირდაპირი ვალდებულება და პასუხისმგებლობა, რომ ამ ადამიანებზე იზრუნოს. სამართლიანობისთვის იბრძვიან იქითაც და აქეთაც. ეს ყველაფერი გვაშორებს იმას, რისთვისაც ვიბრძვით და რაც გვაერთიანებს — ევროპული მომავალი", — აცხადებს თამარ ანსიანი NEWS.On.ge-სთან.