"ჩვენი მხარდაჭერა უკრაინის ტერიტორიული მთლიანობის, სუვერენიტეტისა და დამოუკიდებლობისადმი ურყევია. ყირიმის უკრაინის შემადგენლობაში დაბრუნება საერთაშორისო სამართლის მოთხოვნაა", — ამის შესახებ თურქეთის პრეზიდენტმა, რეჯეფ თაიფ ერდოღანმა ყირიმის პლატფორმის ლიდერთა მეოთხე სამიტზე ვიდეო მიმართვაში განაცხადა. ინფორმაციას თურქული მედია ავრცელებს.

ერდოღანის თქმით, ყირიმის ანექსიამ ყირიმელი თათრების ტანჯვა გააღრმავა, რომლებმაც 80 წლის წინ დეპორტაცია განიცადეს. თურქეთის პრეზიდენტმა ხაზი გაუსვა, რომ ყირიმელი თათრების უსაფრთხოებისა და კეთილდღეობის უზრუნველყოფა თურქეთის საგარეო პოლიტიკის ერთ-ერთი პრიორიტეტია.

ერდოღანის განცხადებით, თურქეთის სურვილია კონფლიქტის მოგვარება.

"ჩვენი გულწრფელი სურვილია, ომი დასრულდეს სამართლიანი და ხანგრძლივი მშვიდობით, რომელიც დაფუძნებული იქნება უკრაინის ტერიტორიულ მთლიანობაზე, სუვერენიტეტსა და დამოუკიდებლობაზე", – აღნიშნა ერდოღანმა.