NATO-ს გენერალური მდივნის, იენს სტოლტენბერგის უფლებამოსილება 1-ელ ოქტომბერს იწურება. მას ჩრდილო-ატლანტიკური ალიანსის გენერალური მდივნის პოსტზე ნიდერლანდების ყოფილი პრემიერ-მინისტრი, მარკ რუტე ჩაანაცვლებს. ამის შესახებ ინფორმაციას ალიანსი ავრცელებს.

გენერალური მდივნის მანდატის გადაცემის ღონისძიებები NATO-ს შტაბ-ბინაში ჩატარდება.

ცნობისათვის, მარკ რუტე NATO-ს გენერალურ მდივნად ოფიციალურად მიმდინარე წლის 26 ივნისს აირჩიეს.

"26 ივნისს, ჩრდილოატლანტიკურმა საბჭომ გადაწყვიტა ნიდერლანდების პრემიერ-მინისტრი, მარკ რუტე NATO-ს მომავალ გენერალურ მდივნად დანიშნოს, რომელიც იენს სტოლტენბერგს შეცვლის. რუტე გენერალური მდივნის მოვალეობის შესრულებას 2024 წლის 1-ელი ოქტომბრიდან შეუდგება, როდესაც ალიანსის სათავეში სტოლტენბერგის ათწლიანი ვადა ამოიწურება", — ნათქვამი იყო ალიანსის მიერ გავრცელებულ ინფორმაციაში.