ბრიტანეთის საგარეო საქმეთა მინისტრთან, დევიდ ლამისთან, ლონდონში გამართულ ერთობლივ პრესკონფერენციაზე, აშშ-ის სახელმწიფო მდივანმა, ენტონი ბლინკენმა განაცხადა, რომ "ჰამასთან" მძევლების გათავისუფლების მოლაპარაკებების საკითხების 90%-ზე მეტი შეთანხმებულია.

ბლინკენმა თქვა, რომ ცეცხლის შეწყვეტის შესახებ მოლაპარაკებები "მიმდინარეობს რამდენიმე საკითხზე", რომლებიც, მისი თქმით, "რთულია, მაგრამ სრულად გადაჭრადი, ჩვენი შეფასებით".

ბლინკენმა არ დააკონკრეტა რაზე მიმდინარეობს მოლაპარაკებები, მაგრამ კამათი იმაზე, თუ ვის უნდა დარჩეს ფილადელფის დერეფნის კონტროლი (ღაზის საზღვრის გასწვრივ ხაზი ეგვიპტესთან) - გავრცელებული ინფორმაციით არის ჩიხის მთავარი მიზეზი.

ისრაელის პრემიერმინისტრმა, ბენიამინ ნეთანიაჰუმ განაცხადა, რომ აპირებს ისრაელის ჯარებმა გააკონტროლონ დერეფანი, მათ შორის რაფაჰის გადასასვლელი, მაისში მისი აღების შემდეგ, რაც ეგვიპტის შეშფოთების საგანია. "ჰამასი" ღაზას სექტორიდან ისრაელის ჯარების სრულ გაყვანას ითხოვს.

ბლინკენმა თქვა, რომ შეთანხმების მიღწევა ორივე მხარის ინტერესშია. მისი თქმით, ისრაელის ინტერესებშია მძევლების დაბრუნება, "ღაზაში ტემპერატურის დაწევა" და ირანთან და ჰუთებთან დაძაბულობის დეესკალაცია.